"Sanki xəstələrə yüksək doza vurmuşdular"- 25 nəfərin öldüyü yanğını işi

29 Sen 2018
85 baxış

Xəstələrin ölümü ilə nəticələnən yanğın hadisəsi ilə bağlı məhkəmə davam edir.

Boyukmillet.com xəbər verir ki, Bakı Ağır Cinayətlər Məhkəməsində Narkoloji Mərkəzdə baş verən yanğınla bağlı həbs edilənlər - Mərkəzin direktoru Telman Məmmədhəsənov, 2-ci müalicə şöbəsinin müdiri Azad Ələkbərov və mərkəzin əməyin təhlükəsizliyi üzrə mühəndisi, yanğın təhlükəsizliyinə cavabdeh şəxs Mahir Abdullayev, yanğını törətməkdə təqsirləndirilən Məhəmməd Məmmədov və onun həkimi, şöbə müdiri Afət Məmmədovanın məhkəməsi keçirilir.

Hakim Azər Paşayevin sədrlik etdiyi məhkəmə iclasında zərərçəkmiş Fərid Dadaşov ifadə verib.

O bildirib ki, məhkəmə qərarı ilə mərkəzdə müalicə alıb.

Dadaşov söyləyib ki, gecə yanğın başlayanda mühafizəçi Amid onları oyadıb:

"Amid qapıları döyə-döyə getdi. Mən yuxudan oyandım və ağzıma dəsmal tutub, başıma isə kurtkamı atıb, çölə qaçdım. Əgər həmin zaman kimsə yerə yıxılsa, elə bil çıxışı tapa bilməyəcəkdi".

Zərərçəkmiş suallara cavabımda təqsirləndirilən M.Məmmədovu müalicə aldığı mərkəzdə bir neçə dəfə gördüyünü söyləyib: "Sanki xəstələrə yüksək doza vurmuşdular. Siqaret çəkməyə icazə vermirdilər, amma mən gizlin çəkirdim. Hadisə zamanı Məhəmmədi orada gördüm, lakin sonra yoxa çıxdı".

F.Dadaşov təqsirləndirilən şəxslərdən heç bir şikayət və tələbinin olmadığını söyləyib.

Hakim bildirib ki, 54 zərərçəkmişdən hələ 31 nəfəri dindirilməyib.

Prosesin davamında təqsirləndirilən M.Məmmədov hadisənin baş verdiyi 15-ci korpusda müalicə alan və sağ qalmış şəxslərin də dindirilməsini istəyib.

Hakim söyləyib ki, həmin şəxslər növbəti iclaslarda ifadə verəcəklər.

Məhkəmənin növbəti iclası oktyabrın 5-nə təyin edilib.

Qeyd edək ki, 2018-ci il martın 2-də Bakı şəhərinin Xətai rayonu ərazisində yerləşən Respublika Narkoloji Mərkəzində çoxsaylı insan tələfatı ilə nəticələnən yanğın baş verib.

Narkoloji Mərkəzdə "alkoqol qəbulu nəticəsində psixi və davranış pozuntuları" diaqnozu ilə müalicə alan Bakı şəhər sakini Məhəmməd Məmmədov 2018-ci il mart ayının 3-də həmin cinayətdə şübhəli şəxs qismində tutulub. İlkin dindirmə zamanı cinayəti törətdiyini etiraf edən M.Məmmədov ailə üzvlərinin ona qərəzli münasibətinə etiraz əlaməti olaraq və Narkoloji Mərkəzdə müalicə almaq istəmədiyinə görə intihar etmək qərarına gəldiyini bildirib. Bu məqsədlə mart ayının 2-si saat 06 radələrində qaldığı palatada yorğana bürünərək onu alışqanla yandırdığını, alov gücləndikdə özünü öldürmək niyyətindən daşınıb yanan yorğanı çarpayısının üstünə atdığını, alovun digər palatalara keçməsindən qorxduğu üçün şöbənin qapısı açılan kimi Mərkəzi tərk etdiyini göstərib.

M.Məmmədov Cinayət Məcəlləsinin 120.2.4-cü (ümümi təhlükəli üsulla qəsdən adam öldürmə), 120.2.7-ci (iki və ya daha çox şəxsi öldürmə), 120.2.9-cu (köməksiz vəziyyətdə olan adamı öldürmə) və 186.2.2-ci (yandırmaqla özgə əmlakını qəsdən məhv etmə) maddələri ilə təqsirləndirilən şəxs qismində cəlb edilərək barəsində məhkəmənin qərarı ilə həbs qətimkan tədbiri seçilmiş, eləcə də kompleks məhkəmə psixiatrik, psixoloji və narkoloji ekspertizalar təyin olunub.

Daha sonra Respublika Narkoloji Mərkəzin direktoru Telman Məmmədhəsənov, şöbə müdiri Azad Ələkbərov və mühəndis Mahir Abdullayev barəsində saxlanılıb və barələrində məhkəmə qərarı ilə üç ay müddətinə həbs qətimkan tədbiri seçilib.

Hər 3 şəxs barəsində CM-nin 225.2 (yanğın təhlükəsizliyi qaydalarını pozma zərərçəkmiş şəxsin ölümünə və ya digər ağır nəticələrə səbəb olduqda) və 308.2 (vəzifə səlahiyyətlərindən sui-istifadə - ağır nəticələrə səbəb olduqda) maddəsi ilə cinayət işi başlanıb.

Şöbə müdiri A.Ələkbərovun səhhətində problemlər olduğu üçün onun cinayət işi ayrıca icraata ayrılıb. O, ürəyindən əməliyyat olunub.

Qeyd edək ki, bu iş üzrə ölənlərlə yanaşı 29 yaralı da var və onlar zərərçəkmiş kimi tanınıb.

(Musavat.com)

Bu xəbərə səs ver
(0 səslər)

Reytinq