Cümə , 19 İyul 2024
Drone Cameras

Azərbaycan deputatları Ermənistan nümayəndə heyətinin təxribat xarakterli çıxışlarını ifşa ediblər

Azərbaycan parlamentinin deputatları Mərakeşdə “Ümumi gələcəyimiz naminə əməkdaşlıq edək” mövzusunda keçirilən Dinlərarası dialoq üzrə Parlament konfransında Ermənistan nümayəndə heyətinin təxribat xarakterli çıxışlarını arqumentli formada ifşa ediblər.

Boyukmillet.com xəbər verir ki, Azərbaycan Milli Məclisinin sədrinin müavini Adil Əliyevin başçılığı ilə nümayəndə heyəti iyunun 13-15-də Parlamentlərarası İttifaq və Mərakeş Krallığı Parlamenti tərəfindən təşkil edilən Mərakeş şəhərində “Ümumi gələcəyimiz naminə əməkdaşlıq edək” mövzusunda keçirilən Dinlərarası dialoq üzrə Parlament konfransına qatılıblar.

Konfrans Parlamentlərarası İttifaq və Mərakeş Krallığı Parlamenti tərəfindən, Sülh naminə Dinlər təşkilatının əməkdaşlığı, həmçinin BMT-nin Sivilizasiyalar Alyansının və Məhəmmədiyyə Din Alimləri Liqasının dəstəyi ilə təşkil olunub.

Konfransda ölkəmizi Milli Məclis sədrinin müavini Adil Əliyev, deputatlar Ceyhun Məmmədov, Mahir Abbaszadə və Azərbaycanın Mərakeş Krallığında fövqəladə və səlahiyyətli səfiri Nazim Səmədov təmsil ediblər.

Konfransın açılış sessiyasında Parlamentlərarası İttifaqın sədri Duarte Paçeko, baş katibi Martin Çungong, Mərakeş Parlamentinin Məsləhətçilər Palatasının sədri Naam Miyara çıxış etmiş, Krallıq Parlamenti Nümayəndələr Palatasının sədri Rəşid Talbi Əl Aləmi isə Mərakeş Kralı VI Məhəmməd tərəfindən ünvanlanmış məktubu tədbir iştirakçılarının nəzərinə çatdırıb.

Parlamentlər və dini liderlər: Dialoqu təşviq etmək, ümumi gələcəyimiz naminə birgə işləmək adlı ümumi iclasda Milli Məclis sədrinin müavini Adil Əliyev çıxış edib. Əsrlər boyu Azərbaycanda müxtəlif xalqların və dinlərin nümayəndələrinin sülh və qarşılıqlı anlaşma şəraitində yaşadığını qeyd edən natiq, ölkəmizdə həyata keçirilən multikulturalizm siyasətinin təməlində xalqların qarşılıqlı hörməti və əməkdaşlığının, tolerantlıq ideyalarının dayandığını bildirərək, ölkəmizdə Prezident İlham Əliyevin müvafiq Sərəncamı ilə 2016-ci ilin Multikulturalizm ili elan edildiyini konfrans iştirakçılarının diqqətinə çatdırıb.

Bundan əlavə, iştirakçılara, “Bakı prosesi” və sivilizasiyalar və mədəniyyətlər arasında dialoqun genişləndirilməsinə dair ölkəmizdə keçirilən çoxsaylı mötəbər tədbirlərə dair geniş məlumat verilib. A.Əliyev çıxışının mühüm hissəsini Ermənistan işğalının nəticələri, soydaşlarımızın qaçqın və məcburi köçkün qismində torpaqlarından qovulması, onlara qarşı soyqırımın həyata keçirilməsi, tarixi-dini abidələrin və məscidlərin dağıdılması mövzusuna həsr edib və 2020-ci ildə Vətən müharibəsi nəticəsində torpaqlarımızın azad edilməsindən sonra erməni barbarlığının nəticələrinin açıq-aydın surətdə üzə çıxdığını, o cümlədən mövcud olan 67 məsciddən 65-nin dağıdılması faktını xüsusi olaraq vurğulayıb.

Bütün bunlara rəğmən ölkəmizin sülh sazişinin imzalanması istiqamətində fəal çalışdığını, lakin Ermənistanın müxtəlif bəhanələrlə bu prosesə əngəl törətdiyini, başda Katolikos II Qaregin olmaqla, Ermənistanda revanşist qüvvələrin azərbaycanafob çağırışlar edərək sülh danışıqlarına maneə törətdiyini qeyd edib.

Konfransın növbəti günü müzakirələr Müxtəlif dünyəvi sistemlərdə din və inanc: Dünyanın hər yerindən nümunələr və qanunun aliliyinin təşviqi üçün birgə işləmək: Yaxşı təcrübələr və problemlər adlı 2 panel üzrə davam edib. Bu panellərdə Ermənistan nümayəndə heyəti öz ənənəsinə sadiq qalaraq, və konfransın ümumi mövzusu ilə heç cür əlaqələndirilməmiş formada, ölkəmizə qarşı əsassız böhtanlarla çıxış edərək ölkəmizin Ermənistana təcavüz etdiyini iddia edib. Buna cavab olaraq deputat Ceyhun Məmmədov, Ermənistanın 30 il torpaqlarımızı isğal altında saxladıdığını, 67 məscidimizdən 65-ni barbarcasına dağıtdığını, təkcə müsəlmanlara məxsus abidələri deyil, kilsələri də məhv etdiyini bildirib, məhz Ermənistanın sülh müqaviləsini imzalamaqdan müxtəlif bəhanələrlə yayındığını diqqətə çatdırıb. Konfrans çərçivəsində bundan sonra da, Ermənistan nümayəndə heyəti dəfələrlə təxribat xarakterli böhtanlı çıxışlar edib, lakin hər dəfə Azərbaycan nümayəndə heyəti tərəfindən bu böhtan və iftiralar arqumentli formada ifşa olunub.


Konfransın gedişində Azərbaycan nümayəndə heyəti tərəfindən Mərakeş Parlamentinin Nümayəndələr Palatasının sədri Rəşid Talbi Əl Aləmi, Məsləhətçilər Palatasının sədri Naam Miyara, Parlamentlərarası İttifaqın sədri Duarte Paçeko, Tanzaniya Milli Assambleyasının sədri Tulia Akson və Qambiya Milli Assambleyasının sədri Fabakari Tombong Catta ilə ikitərəfli görüşlər keçirilmiş və bu görüşlərdə qarşılıqlı maraq doğuran məsələlər müzakirə edilib.

Sonda konfransın yekun sənədi qəbul olunub.

Check Also

İlham Əliyev Oksfordda Almaniya kansleri ilə görüşüb

Azərbaycan Prezidenti İlham Əliyev iyulun 18-də Oksfordda qarşı tərəfin müraciətinə əsasən Almaniya Federativ Respublikasının Kansleri …