Çərşənbə , 5 Avqust 2020
Home » Dünya » İran Ermənistanın İsraildə səfirlik açmasına hörmətlə yanaşdığını bildirir

İran Ermənistanın İsraildə səfirlik açmasına hörmətlə yanaşdığını bildirir

Boyukmillet.com xəbər verir ki, İranın İrəvanda akkreditə edilmiş səfiri Abbas Bədəxşan Zühuri Ermənistanın İsraildə səfirlik açmaqla bağlı qərarına münasibət bildirib.

Ermənistanın İctimai Televiziya Şirkətinə verdiyi müsahibədə diplomat ölkəsinin İrəvanın qərarına hörmətlə yanaşdığını deyib.

“Ölkəmin İsrailə qarşı mövqeyi uzun illərdir ki, hamıya məlumdur. Qonşularımızla problem yaratmamağa çox həssas yanaşırıq. Lakin İsrail həmişə bizim qonşularımızla olan gözəl münasibətlərimizi pozmağa cəhd göstərir. İran Ermənistanın qərarına hörmətlə yanaşır. Biz bu məsələ ilə bağlı narahatlığımızı hər zaman Ermənistan rəhbərləri ilə görüşümüzdə dilə gətiririk. Bizim mövqeyimiz belədir- qonşularımızla gözəl münasibətlərimiz var və buna xələl gətirmək istəmirik”, – deyə Abbas Bədəxşan Zühuri əlavə edib.

Xatırladaq ki, Ermənistan rejimi 2019-cu ilin sentyabr ayında Tel-Əvivdə səfirlik açmaqla bağlı qərar qəbul edib. İlk vaxtlar İran və bu ölkənin İrəvandakı sözügedən səfiri Abbas Bədəxşan Zühuri Ermənistanın qərarını kəskin tənqid etmişdi. Səfirin mövqeyində dəyişiklik rəsmi Tehranın bu istiqamətdə ya mövqe dəyişdirdiyini, ya da İrəvanla hansısa razılığa gəldiyini göstərir. Digər tərəfdən, İran Azərbaycanı daim İsraillə olan dostluq münasibətinə görə kəskin surətdə tənqid edir və ölkəmizin daxili işlərinə qarışır. Halbuki Azərbaycan indiyədək İsraildə səfirlik açmayıb.

Check Also

Medvedev Azərbaycan və erməni diasporlarına xəbərdarlıq edib

Rusiyanın sabiq Prezidenti və Baş Naziri, Təhlükəsizlik Şurası sədrinin müavini Dmitri Medvedev Azərbaycan və erməni …