Çərşənbə axşamı , 9 Avqust 2022
Home » Cəmiyyət » Polkovnik Tehran Mənsimov: Ermənilər deyirdilər, biz vururduq, Azərbaycan hərbçiləri qalxaraq gəlirdilər. Həqiqətən…

Polkovnik Tehran Mənsimov: Ermənilər deyirdilər, biz vururduq, Azərbaycan hərbçiləri qalxaraq gəlirdilər. Həqiqətən…

O, Vətən müharibəsinin qəhrəmanlarındandır. Bir çox silahdaşları kimi adına dastanlar qoşulacaq komandirdir. O, eyni zamanda işinin peşəkarı olan hərbçidir. Onunla söhbət də maraqlıdır. Xüsusən də Şuşanın işğaldan azad edilməsi ilə bağlı söylədikləri. Söhbət Naxçıvan Əlahiddə Ümumqoşun Ordunun zabiti, polkovnik Tehran Mənsimovdan gedir. T.Mənsimovun Naxçıvanın “Şərq Qapısı” qəzetinə müsahibəsindəki məhz Şuşa ilə bağlı hissəni təqdim edirik:

“Şuşaya gedən yol var. Həmin yol açılmadığına görə, orada mürəkkəb, qızğın döyüşlər gedirdi. Düşmən bütün gücünü həmin əraziyə cəlb etmişdi. Minalanmış sahələrdə canlı qüvvə və zaman itkisinə yol verməmək üçün bizə yeni tapşırıq gəldi. Əlavə olaraq, 3 briqada mənim tabeliyimə verildi. Xüsusi təyinatlılara şərait yaratmaq üçün Daşaltı bölgəsini nəzarətə almalı, oradakı düşmən qüvvələrini məhv etməli idik. O vaxta kimi xüsusi təyinatlılar Şuşaya girəcəkdilər. Onlar meşədən keçib Şuşaya girənə qədər döyüşüb düşməni öz üzərimizə çəkməli idik. Həmin gün şəhidlərimizin qanı bahasına hədəfə çatdıq və noyabrın 4-də Daşaltını işğaldan azad etdik. Sonrakı günlərdə də düşmənin saysız əks-hücumlarını dəf etdik. Bu döyüşlərdə Naxçıvan xüsusi təyinatlılarının şücaətini xüsusi vurğulamaq istəyirəm. Xüsusilə, Anar Əliyev və Nihad Babayevi, böyük qəhrəmanlıq göstərən Renat Şıxnəbiyev, Əli Kərimov və Elnur Şirinovun igidliyi gələcək nəsillərimiz üçün örnəkdir…

Ermənilər deyirdilər ki, biz vururduq, Azərbaycan hərbçiləri yenidən qalxaraq üzərimizə gəlirdi. Həqiqətən də, həmin döyüşlərdə Naxçıvan xüsusi təyinatlıları qeyri-adi iradə, böyük fədakarlıq və qəhrəmanlıq göstərdilər… Noyabrın 6-da artıq xüsusi təyinatlılarımız Şuşa yaxınlığında yaxın təmas döyüşünə keçmişdilər. Döyüşən 4 hərbi hissənin hər birində Naxçıvan xüsusi təyinatlıları var idi. Ayın 7-si artıq Şuşaya şanlı bayrağımızı sancdıq, ilk azan oxundu. Bu hissləri sözlərlə ifadə etmək çox çətindi. Oxunan azan səsi və Dövlət Himnimizi eşidən yaralılarımıza, sanki yenidən həyat verilirdi. Şuşa azad olunandan dərhal sonra ilk ürəyimdən keçən namaz üstdə şəhid olan qəhrəman oğullarımızın ruhuna və igid döyüşçülərimizə dua etmək, Allaha şükranlığımı sevinc göz yaşları ilə çatdırmaq oldu. Düşmən sonra da əks-hücuma keçdi və bu hücumların da qarşısı alındı. İgidlərimiz canları bahasına Şuşanı qoruyub saxladı. Ölkənin müxtəlif yerlərində bu qələbəmizi coşqu ilə qarşılayan xalqımızın sevinci bizə daha böyük ruh yüksəkliyi verirdi”. 

Check Also

Baş Prokurorluq Şuşaya səfər etmək istəyənlərə müraciət ünvanlayıb

Baş Prokurorluq Şuşa şəhərinə səfər etmək istəyən vətəndaşlara müraciət ünvanlayıb. Boyukmillet.com-un xəbərinə görə, bununla bağlı …