Ağaevli Əli Hacıdan TƏZƏ ŞEİRLƏR 

O,dünyanın daş qapısı-

bu dünyanın əl işidi !

Gələnlərin ağ donunu

gedənlər kəfən daşıdı !

Nə olumdu,nə itimdi

hər şey bitdi,yol bitmədi !

Yolçular yola getmədi,

hamı olmağın yaşadı !

Allah qovdu öz göyündən,

yuva saldım söz köyündə !

Bu yaxasız köynəyimdə

bir qızın əlin daşıdım !

İş köhnədi,söz boyatdı

torpaq alta bata-batdı !

Ömrün vaxtı saatladı,

sözün vaxtı dil işidi !

İçimin alıb hisini,

tozun yatırdım hirsimin!

Ömrümün çox hissəsinin,

bircə varağın yaşadım !

            ***

Şəhər nəfəs almır,çıxıb getmisən

Yolları üşüyür ayaqlarına !

Vaxt günün içində intihar edir,

Gecə işıq vermir oyaq qalana !

Sönən ulduzların işıqlarından,

Təsəlli yığıram ömrün belinə !

Səninçün əkdiyim tər-çiçəklərin,

Şəkər bağlamışam tikan dilinə !

İçib sağlığına qəm şərabından,

Xatirə yeyirəm şam yeməyində !

Gəlib ürəyimə bir köz salmadın,

Yollar saflığına qar geyinəndə !

Daha,ətək vermir boş ələ kimsə,

Ya ətək kəsilir bir əl çatmasın !

Səni də yaradan elə yaradıb,

Səni sevəninin bağrı çatlasın ?!

Bu şəhər,bu səhər,bu axşamların

Ayıla bilmirəm sənsiz yoluna !

Varsa,ayrılığdan göz yaşı göndər,

Səpim tənhalığın susuz yoluna !

     ***

İş-gücüm yaman çoxalıb,

gündə min günah yuyuram !

Səndə bir günah gəzirəm,

məndə min günah yuyuram !

Göydən düşüb yer əyildim,

bir ev tikib yer əyirdim!

El-el buzlaşıb əridim,

gendə min günah yuyuram !

Tanrım ! Yenə yerdəki-mən ,

öz yolumdu,bir də ki,mən !

Sən verdiyin dindəki-mən,

dində min günah yuyuram !

     ***

Dur,  dünya qəmini gətir,

Sevgimə büküm,gedəsən !

Ya olmağın dinin gətir,

Görəsən təkəm, gedəsən !

Dünyadı da hamı gəlir,

Əvəllə son qəmi gəlir !

Birin sonra cəmi gəlir,

Yelkənin çəkəm,gedəsən !

Gədiyə var,Ərzurumun

Başında qar-Ərzurumun !

Yaxasız köynək arzumu

Boyuna tikəm,gedəsən !

Kim çalır Yanıq Kərəmi ?!

Sazın,sözün yox kərəmi !

Mən,çəkəm bu olun qəmin,

Sən,bu paydan kəm gedəsən !

Aralıqda çox dağ durur,

Ayrılıq,vardan sağ durur !

Yaramı sarı,sağ olu

Verim,son tikəm gedəsən !