Boyukmillet.com Biz yanmasaq vətən yanar
Bu gün Bakı Dövlət Universitetində (BDU) Yaponiyanın ölkəmizdəki fövqəladə və səlahiyyətli səfiri Tsuquo Takahaşininin rəhbərlik etdiyi nümayəndə heyəti ilə görüş keçirilib.
Bu barədə Trend-ə BDU-nun Mətbuat və informasiya şöbəsindən məlumat verilib.
Qonaqları salamlayan rektor, akademik Abel Məhərrəmov universitetin beynəlxalq əlaqələrindən, o cümlədən Yaponiya universitetləri ilə uğurlu əməkdaşlıqdan bəhs edib. Qeyd edib ki, 2000-ci tədris ilindən etibarən Bakı Dövlət Universitetinin Şərqşünaslıq fakültəsində “Uzaq Şərq dilləri və ədəbiyyatı” kafedrası yaradılıb, Yapon dili və ədəbiyyatı, Çin dili və ədəbiyyatı, Koreya dili və ədəbiyyatı ixtisasları açılıb. Bu illər ərzində Yaponşünaslıq ixtisasının 11 buraxılışı üzrə 100-dək bakalavr, yeddi buraxılış üzrə 10-dan artıq magistr hazırlanıb, bir nəfər elmlər doktoru dissertasiyası müdafiə edib. Məzunlardan altı nəfəri Yaponiyada magistraturada təhsil alıblar. Bakı Dövlət Universiteti və Yaponiyanın Azərbaycandakı səfirliyinin birgə təşkilatçılığı ilə ötən illə ərzində ənənəvi olaraq Bakı Yapon dili Natiqlik müsabiqəsi, konfranslar, Yapon mədəniyyət günləri kimi tədbirlər keçirilib. A.Məhərrəmov bildirib ki, hazırda BDU – şərqşunaslıq fakultəsinin məzunları yaponiyanın ölkəmizdəki səfirliyində çalışır, eləcədə universitet məzunları Tokiyoda tez tez beynəlxalq müsahibələrdə qalib gəlirlər. Rektorun sözlərinə görə, ikitərəfli münasibətlər uğurla inkişaf edərək, dostluq və tərəfdaşlıq xarakteri daşıyır.
Səfir Tsuquo Takahaşi öz növbəsində, BDU ilə əməkdaşlıqdan məmnunluğunu ifadə edib, bu müddətdə həyata keçirilən işləri yüksək qiymətləndirib. Yaponşunaslıq kafedrasının yaradılmasından və fəaliyyətindan söz açan səfir, Azərbaycanda Yaponiya olan marağın artmasını vurğulayıb. Diplomat bu cür lahiyələrin həyata keçirilməsinin iki tərəfli münasibətlərin möhkəmləşdirilməsinə töhvə verəcəyinə inamını ifadə edib. Səfir bu il marta Azərbaycanda öz missiyasını bitirdiyini bildirərək, Azərbaycan və Yaponiya arasındaki münasibətlərin daim inkişaf edəcəyini bildirib.
Sonra Yaponiya Hökumətinin maliyyə dəstəyi ilə “Bakı Dövlət Universitetinin Yapon dili şöbəsinin təkmilləşdirilməsi” layihəsi üzrə qrant müqaviləsinin imzalanma mərasimi keçirilib. Layihənin əsas məqsədi Yapon dili şöbəsinin otaqlarını təmir etmək və lazımi avadanlıqlarla təchiz etməklə, sözügedən şöbədə təhsilin səviyyəsini yaxşılaşdırmaqdır. Layihənin ümumi məbləği 77,060 ABŞ dolları təşkil edir.
