Cənubi Koreya Rumıniyaya 939 milyon dollar dəyərində silah tədarük edəcək

Cənubi Koreya Rumıniya ilə təxminən 1,3 trilyon von (939 milyon ABŞ dolları) dəyərində böyük silah partiyası satmaq üçün müqavilə bağlayıb.

Boyukmillet.com xəbər verir ki, bu barədə “Yonhap” agentliyi məlumat yayıb.

Sənədə əsasən, Cənubi Koreyanın “Hanwha Aerospace” Rumıniyaya silah və sursat ixrac edəcək. Rumıniya tərəfi əsasən 54 “K-9” özüyeriyən haubitsa və 36 zirehli maşın alacaq.

Məlumata görə, bu, Rumıniyanın son 7 ildə ən böyük silah alqı-satqısı müqaviləsidir.

Cənubi Koreya artıq bir neçə ölkəyə, o cümlədən Avstraliya, Misir, Hindistan, Norveç, Polşa, Türkiyə, Finlandiya və Estoniyaya özüyeriyən haubitsalar tədarük edib.