Boyukmillet.com Biz yanmasaq vətən yanar
25 aprel Sahibkarlar Günü münasibətilə Naxçıvan Biznes Mərkəzində tədbir keçirilib.
Boyukmillet.comxəbər verir ki, tədbirdə “Biznesdə Uğur-2016” nominasiyaları və “Ən fəal işəgötürən” nominasiyası üzrə qalib gələn sahibkarlara mükafatlar təqdim edilib.
Beləki “Biznesdə Uğur -2016” nominasiyaları üzrə “Naxçıvan bağları” Məhdud Məsuliyyətli Cəmiyyəti “İlin şirkəti”, “Danyeri” iaşə, ticarət xidməti və istehsal sahəsi “İlin sahibkarı”, “Daxili Araz yükdaşıma şirkəti” Məhdud Məsuliyyətli Cəmiyyəti “İlin məhsulu”, “MM” Ət və Ət Məhsulları İstehsalı Müəssisəsi “İlin ixracatçısı”, “Nəqşicahan Holdinq şirkətlər qrupu” Məhdud Məsuliyyətli Cəmiyyəti “İlin yerli məhsul alıcısı” nominasiyalarına, “Ən fəal işəgötürən” nominasiyası üzrə isə “Naxçıvan məhsulları” Məhdud Məsuliyyətli Cəmiyyəti layiq görülüblər. Mükafatlar sahibkarlara təqdim edilib.
Qeyd edək ki, “Biznesdə uğur” mükafatı Naxçıvan Muxtar Respublikası Ali Məclisi Sədrinin tapşırığı ilə sahibkarların fəaliyyətinin qiymətləndirilməsi üçün 2009-cu ildə təsis edilib.
Tədbirdə Naxçıvan Muxtar Respublikasının iqtisadiyyat naziri Famil Seyidov çıxış edərək bildirib ki, muxtar respublikada fəaliyyət göstərən ixrac potensiallı müəssisələrdə istehsal olunan elektrik enerjisi, ərzaq, tikinti, mebel, yüngül sənaye məhsulları Türkiyə, Ukrayna, Qazaxstan, Gürcüstan, Belarus, Litva, Türkmənistan, Rusiya və İran İslam Respublikasına ixrac edilir.
Tədbirdə Naxçıvan Muxtar Respublikasının Sahibkarlar Konfederasiyasının sədri Vüqar Abbasov, “Nəqşicahan Holdinq Şirkətlər Qrupu” Məhdud Məsuliyyətli Cəmiyyətinin direktoru Abbas Talıbov və “D-Adlı Qaymaq” Məhdud Məsuliyyətli Cəmiyyətinin sahibkarı Elşad Məmmədov çıxış edərək dövlətin sahibkarlığın inkişafına göstərdiyi qayğını yüksək qiymətləndiriblər.
Əbülfəz Dünyamalıyev
(NTV Xəbər)
