“Ölkə.Az” xəbər verir ki, bu fikirləri Milli Məclisin deputatı, ATƏT Parlament Assambleyasının vitse-prezidenti Azay Quliyev Kiyevdə Qlobal Təşəbbüsləri Dəstəkləyən Parlamentarilər Təşkilatının 40-cı illik Forumu və Beynəlxalq Cinayət Məhkəməsi və Qanunun Aliliyinə dair Parlamentarilərin 10-cu Konsultativ Assambleyasında “Beynəlxalq cinayətlərin milli və beynəlxalq səviyyədə qarşısının alınması: çağırışlar və imkanlar” mövzusuna həsr edilmiş paneldə çıxışı zamanı bildirib.
A.Quliyev beynəlxalq cinayət törətmiş şəxslərin cəzalandırılması üçün BMT Təhlükəsizlik Şurasını təsirli addımlar atmağa çağırıb:
“Dünən keçirilən müzakirələr zamanı “Ermənistan-Azərbaycan Dağlıq Qarabağ münaqişəsi” üzrə ayrıca Tribunalın yaradılması haqqında təklif səsləndirdim. Hesab edirəm ki, beynəlxalq cinayət törətmiş şəxslərin cəzalandırılması və belə bir tribunalın yaradılması üçün BMT Təhlükəsizlik Şurası təsirli addımlar ata bilər. Cəzasızlıq isə yeni cinayətlərə yol açır”.
Deputat çıxışında Ermənistanın ölkəmizə qarşı yürütdüyü işğalçılıq siyasəti haqqında tədbir iştirakçılarına ətraflı məlumat verib:
“Beynəlxalq cinayətlər törətmiş şəxslərin cəzalandırılması Azərbaycan üçün olduqca mühüm əhəmiyyət kəsb edir. Çünki Azərbaycanın Dağlıq Qarabağ bölgəsində baş verən hadisələr yalnız ölkəmizin ərazisinin işğalı ilə deyil, həm də soyqırımı cinayəti, insanlığa qarşı hərbi cinayətin törədilməsi ilə nəticələnib”.