Ermənistanda Sarkisyana etiraz edən tələbələri döyüb oğurlayırlar – FOTO

İnterpress.az erməni mətbuatına istinadən xəbər verir ki, ermənilər Serj Sarkisyanın baş nazir postuna gəlməsinə etiraz əlaməti olaraq aksiya keçirirlər. Aksiya paytaxt İrəvanın bütün mərkəzi küçələrini əhatə edib. 

Bir neçə gündür davam edən etiraz aksiyasında yüzlərlə erməni etirazçıların həbs olunmasına baxmayaraq, onlar Sarkisyanın vəzifədən uzaqlaşdırılmasına nail olmayana qədər mitinqlərindən əl çəkməyəcəklərini bildiriblər.

Etiraz aksiyasına rəhbərlik edən “Vətəndaş müqaviləsi” Partiyasının lideri deputat Nikol Paşinyan bildirib ki, S.Sarkisyanın hakimiyyətdən uzaqlaşdırılması üçün mitinqlərini davam etdirəcək.

Aksiyada yerli etirazçıların sayının çox olması paytaxt İrəvanın bir neçə küçə və prospektlərinin bağlanmasına səbəb olub.

Hadisə yerinə polis əməkdaşları və Xüsusi Təyinatlı Qüvvələr cəlb olunsa da, onlar etiraz aksiyasını yatıra bilməyiblər.

Aksiyada iştirak edən tələbələrin isə mülki geyimli polislər tərəfindən döyülərək oğurlandıqları bildirilir.