Boyukmillet.com Biz yanmasaq vətən yanar
Gürcüstanda yaşayan azərbaycanlı Arzu Bayramova yaşlı azərbaycanlı nəslin gürcü dilini öyrənməsinə kömək edəcək bir layihəyə başlamaq niyyətindədir.
Onun sözlərinə görə, bu nəsil dil baryeri səbəbindən problemlərlə üzləşir.
“İnzibati orqanlarda problemlər yaranır, çünki onlar bir ifadə yaza bilmirlər. Təcili yardım işçiləri ilə əlaqə qura bilmirlər – nə gürcü, nə də rus dilində danışırlar. Heç bir operator Azərbaycan dilində danışa bilmir… Kömək üçün bizə müraciət edirlər.
Pandemiya səbəbindən müəyyən çətinliklər yaranıb. Vəziyyət yaxşıya doğru dəyişəndə yaşlıların da gürcü dilini ən azı ünsiyyət qura biləcək səviyyədə öyrənmələri üçün layihəyə başlamaq istəyirəm”, – deyə o netgazeti.ge portalına verdiyi müsahibədə deyib.
A.Bayramovanın sözlərinə görə, gürcü dilini bilməyən azərbaycanlılar ölkədə baş verən proseslərdən uzaq qalırlar.
“Bu yaxınlarda soruşdular: deyirlər, 500 lari verirlər, bu təzminat nə üçündür? Dəqiq məlumat olmadı. Bölgədə radio və televiziya Azərbaycan dilində yayımlanır, amma yayım bizimki də daxil olmaqla bir çox kəndə çatmır. Bu problem həll edilsə, yaxşı olar”, – Arzu deyir.
Onun fikrincə, dilin öyrənilməsi məsuliyyəti insanlarda olduğu qədər dövlətin də üzərinə düşür:
“Əhali hazırdır, maraqlanır, amma dövlət kömək etməli, daha çox proqram təklif etməlidir”.
Fəal təhsil sistemində bir çox yeniliyin olduğuna, ancaq nadir hallarda etnik azlıqların nəzərə alınmasına diqqət çəkib:
“Düşünürəm ki, onlar üçün daha çox proqram olmalıdır. Maraq çox böyükdür”.
O, artıq gürcü dilini gənclərə öyrətmək üçün bir layihə başladıb.
“Gürcü və ingilis dillərini öyrətdim. Gənclər qonşu kəndlərdən tədris mərkəzinə gəlirdilər. Bəzən kilometrlərlə məsafədən gəlirdilər, nəqliyyatla bağlı problemlər olsa da, gəlirdilər.
Motivasiya var. Düşünürəm ki, dövlət məktəblərdə gürcü dilinin tədrisini gücləndirməlidir ki, dili öyrənmək üçün kilometrlərlə yol getmək lazım olmasın.
Bu mərkəzdə təxminən 10 min nəfər təhsil alıb. Hələ də maraq var: hazırda tələbə sayımız 200-ə qədərdir. Kənd yerlərində yaşayanların inkişafdan geri qalmaması üçün dövlətin iştirakı vacibdir”, – deyə Arzu Bayramova qeyd edib.
