Boyukmillet.com Biz yanmasaq vətən yanar
Türkiyədə yaşayan azərbaycanlı rəssam Əbülfəz Fərəcoğlunun İstanbulun tarixi “Taksim Tunel” sənət qalereyasında “Art Party” adlanan fərdi sərgisi açılıb.
Ə.Fərəcoğlu “Report”un Türkiyə bürosunun müxbirinə açıqlamasında 20 ildən çoxdur qardaş ölkədə fəaliyyət göstərdiyini bildirib: “1997-ci ildə Ankarada sərgi açdıqdan sonra Türkiyə Jurnalistlər Federasiyasından dəvət aldın və həmin ildən qardaş ölkədə fəaliyyət göstərirəm. 1997-ci ildən sonra Türkiyənin müxtəlif şəhərlərində onlarla sərgiyə imza atmışam. Bakıda da qalereyam var, tez-tez Azərbaycana gedirəm. Əsas fəaliyyətim İstanbulun Yeşilköy səmtindəki rəsm qalereyamdadır. Burada yüzlərlə tələbələrim var. Demək olar hər il sərgilərim olur. Bugünkü sərgimin adı “Art Party”dir. Rəsmin fərqli bir dili ilə desək, bu sənətin aşiqlərini başıma toplamışam. Mənim bütün rəsimlərimdə Azərbaycan çizgiləri var. Növbəti sərgimi Azərbaycanla bağlı edəcəyəm. Hazırda bunun üzərində ciddi işləyirəm”.
Azərbaycanlı rəssam bəzən onun dəsti-xəttini anlamayanların olduğunu da söyləyib: “Hətta bəziləri deyir ki, elə çək biz də anlayaq. Mən dahi Vaqif Mustafazədəni misal çəkirəm və vurğulayıram ki, o, necə muğamı sintez edirsə, mən də klassik bir görüntüyə öz imzamı ataraq müasirliyi də əlavə etməklə fərqli bir sənət əsərinə çevirirəm. Düşünürəm ki, sənətkar öz işini görməlidir. Onun ardınca axın edən xalq, sənətdən anlayan insanlar mütləq gələcək”.
Ə.Fərəcoğlu qeyd edib ki, rəsm sərgisi dekabrın 12-dək sənətsevərlərin ziyarətinə açıq olacaq: “Mən İstanbulda olan həmvətənlərimizi də sərgimə dəvət edirəm. Onların ziyarəti məni qürurlandırar. Çünki harada olmağımızdan asılı olmayaraq ürəyimiz Azərbaycanla döyünür”.
Qeyd edək ki, 1956-cı ildə Naxçıvanda anadan olan rəssam Əbülfəz Fərəcoğlu yaradıcılığını 1997-ci ildən Türkiyədə davam etdirir. Onun 2006-cı ildə İstanbulun Yeşilyurt məhəlləsində yaratdığı “Ekim” sənət mərkəzində 60 tələbə dərs alır. Bundan başqa, Əbülfəz Fərəcoğlu 13 ildir İstanbulun Çəmbərlitaş məhəlləsindəki Mətbuat Muzeyinin sənət emalatxanasında dərs deyir. Onun tabloları ABŞ, Yaponya, Danimarka, Almaniya, Bolqarıstan, Fransa, Polşa, Rusiya, Ukrayna və bir çox ölkələrdə mühüm kolleksiyalarda yer alıb.
