Boyukmillet.com Biz yanmasaq vətən yanar
boyukmillet.com Dövlət Gömrük Komitəsinin Mətbuat xidmətinə istinadən xəbər verir ki, Azərbaycan-İran gömrük xidmətləri arasında əldə olunan razılığa əsasən iyulun 24-dən etibarən Bakı-Naxçıvan-Bakı marşrut xətti üzrə səfər edən sərnişin avtobusları daha tez mənzil başına çatacaq və sərhədkeçmə prosesi zamanı tətbiq edilən gömrük nəzarəti yoxlamaları azaldılacaq.
Əvvəllər sərhədi keçən avtobuslar hər iki ölkənin gömrük postlarında ümumilikdə 4 dəfə gömrük nəzarətindən keçirilir və bu zaman həm də sərnişinlərin əl yükləri dəfələrlə yoxlanılırdı. Bu da vaxt itkisi ilə yanaşı, xüsusilə gecə reyslərində səyahət edən sərnişinlər üçün diskomfort vəziyyət yaradırdı.
Son bir il ərzində İranın gömrük xidmətinin rəhbərliyi ilə Bakıda və Naxçıvanda keçirilən ikitərəfli görüşlərdə müvafiq təkliflər irəli sürülüb, İranın müvafiq qurumları qarşısında məsələ qaldırılıb. Aparılan danışıqların və həyata keçirilən tədbirlərin nəticəsi olaraq Bakı-Naxçıvan-Bakı marşrut xətti üzrə hərəkətdə olan avtobuslardakı əl yüklərinin sərhəd keçid məntəqələrində yoxlanma prosedurlarında dəyişikliyə dair razılıq əldə olunub. Razılığa əsasən, Azərbaycan tərəfdə gömrük nəzarətindən keçirilən avtobuslar və sərnişinlərə aid yüklər xüsusi nömrələr və plomblarla təmin olunduqdan sonra İran ərazisinə daxil olur. İki ölkənin gömrük orqanları arasında imzalanan memoranduma əsasən, Azərbaycan qarşı tərəfə avtobusların yük yerlərində qaçaqmal faktı təşkil edən və İran ərazisində dövriyyəsi qadağan edilən malların olmadığına dair təminat verdiyi üçün avtobuslar İranda artıq gömrük yoxlamasından keçirilmir. Beləliklə, İran ərazisinə daxil olan avtobusun heç bir əlavə yoxlama aparılmadan sürətli şəkildə gömrük postlarından keçidi təmin olunur.
İyulun 24-də yeni qaydaların tətbiqi çərçivəsində iki ölkənin gömrük orqanlarının nümayəndələri arasında görüş keçirilib. Bu gün saat 09:00-da Bakı Beynəlxalq Avtovağzal Kompleksindən Bakı-Naxçıvan-Bakı marşrutu ilə yola düşən avtobus saat 11:30-da Cənub Ərazi Baş Gömrük İdarəsinin “Biləsuvar” gömrük postuna çatıb. Postun ərazisinə daxil olan sərnişin avtobusunun sərhədkeçmə prosesi hər ölkənin gömrük xidmətinin nümayəndələri tərəfindən izlənilib. Sərnişinlərə məxsus əl yükləri yoxlanıldıqdan və müvafiq nömrələrlə təmin edildikdən sonra avtobusun yük yerinə yığılıb və nəqliyyat vasitəsi gömrük təminatı vurularaq yola salınıb. Daha sonra nümayəndə heyətlərinin üzvləri İran tərəfə keçərək buradakı gömrük postunda həyata keçirilən prosesləri müşahidə ediblər.
Qeyd edilib ki, tərəflər arasında keçirilən görüş zamanı iki ölkə arasında gömrük sahəsində əməkdaşlığın daha da gücləndirilməsi, tranzit dəhlizlərinin potensialının artırılması, gömrük prosedurlarının sadələşdirilməsi və digər məsələlər ətrafında da müzakirələr aparılıb.
Naxçıvan Muxtar Respublikasının gömrük orqanları ilə İran İslam Respublikasının müvafiq qurumları arasında əlaqələrin yüksələn xətlə inkişafı qeyd olunub. Bu əlaqələrdə həyata keçirilən yüksəksəviyyəli rəsmi səfərlərin əhəmiyyətli rol oynadığı diqqətə çatdırılıb.
