Boyukmillet.com Biz yanmasaq vətən yanar
Bayden administrasiyası dövründə ABŞ kəşfiyyatı İsraillə bəzi əsas məlumatların mübadiləsini müvəqqəti olaraq dayandırıb.
Boyukmillet.com Reuters agentliyinə istinadən xəbər verir ki, buna Qəzza müharibəsi ilə bağlı narahatlıqlar səbəb olub. Agentlik vəziyyətlə tanış olan altı mənbəyə istinadən bildirir ki, 2024-cü ilin ikinci yarısında Vaşinqton İsrail xidmətlərinin Qəzza üzərində əməliyyat aparan ABŞ pilotsuz təyyarəsindən video yayımlarına birbaşa çıxışını müvəqqəti olaraq bloklayıb.
İsrail bu məlumatlardan HƏMAS yaraqlılarını və girovların yerini axtarmaq üçün istifadə edib. Bu, ən azı bir neçə gün davam edib. Mənbələr həmçinin qeyd ediblər ki, ABŞ İsrailin Qəzza zolağındakı yüksək prioritetli hərbi hədəflərə zərbə endirmək üçün bəzi ABŞ kəşfiyyat məlumatlarından istifadəsini də məhdudlaşdırıb. Mənbələr bu qərarın dəqiq nə vaxt verildiyini dəqiqləşdirməyiblər.
Reuters qeyd edir ki, məhdudiyyətlər ABŞ kəşfiyyatının Qəzzada mülki itkilərin sayı ilə bağlı artan narahatlıqları və İsrail təhlükəsizlik xidmətlərinin fələstinli məhbuslara pis rəftar etməsi barədə məlumatlar fonunda yaranıb.
Üç mənbə bildirib ki, ABŞ İsrailin Amerika kəşfiyyat məlumatlarından müharibə qanunlarına uyğun istifadə edəcəyinə dair kifayət qədər zəmanət verib-vermədiyinə şübhə edib. ABŞ qanunvericiliyinə əsasən, bu cür zəmanətlər məxfi məlumatların xarici ölkələrlə paylaşılması üçün ilkin şərtdir.
İki mənbəyə görə, Bayden administrasiyası kəşfiyyat paylaşımı və silah satışı da daxil olmaqla, İsrailə ümumi dəstəyini davam etdirib. Bununla belə, müəyyən məlumat axınlarını müvəqqəti olaraq məhdudlaşdırmaq qərarları ABŞ kəşfiyyat orqanlarının öz daxilində qəbul edilib və taktiki xarakter daşıyırdı. Məqsəd məlumatların beynəlxalq humanitar hüquqa uyğun istifadəsini təmin etmək idi.
