“Paşinyanın ara qarışdırmaq planı yenə alınmadı” – Adil Əliyev

Azərbaycan prezidenti İlham Əliyev həmişə olduğu kimi yenə işğalçı dövlətin baş naziri Nikol Paşinyanı yerində otuzdurdu. Cənab prezident məşhur Münhen Təhlükəsizlik Konfransında Paşinyanın və Ermənistanın illərdir yürütdüyü işğalçı siyasəti rəqəmlərlə və faktlarla ifşa etmişdi. Azərbaycan prezidentinin Ermənistanda fazişmin təbliğatıyla bağlı sadaladıqları faktlara da Paşinyan tutarlı cavab verə bilmədi. Paşinyanın bu dəfəki təxribat cəhdi də uğursuzluğa düçar oldu.

İyunun 18-də Şərq Tərəfdaşlığı Proqramına üzv ölkələrin videokonfrans formatında keçirilən sammitində Nikol Paşinyan mövzudan kənarlaşaraq azərbaycanlı zabit Ramil Səfərovun erməni zabitini öldürməsi məsələsini qaldırdı. Paşinyan və digər erməni rəsmilər ilk dəfə deyil ki, bu mövzunu ortaya atır və beynəlxalq təşkilatlardan dəstək almağa – 15 il əvvəl baş vermiş hadisəni qınamağa çağırırlar. Paşinyana və digərlərinə Ramil Səfərovun erməni zabitini nəyə görə cəzalandırdığı dəfələrlə izah olunub. Azərbaycan zabiti bayrağımızı aşağlayan işğalçı ölkənin hərbçisinə seyrçimi qalmalıydı?

Paşinyanın ara qarışdırmaq planı yenə alınmadı. Azərbaycan prezidenti Paşinyana ölkəsinin yaxın keçmişini bu sözlərlə xatırlatdı: “Ermənistanın baş nazirinə irqçilik haqqında danışmağı məsləhət görməzdim, çünki erməni terrorçuları dünyaca məşhurdurlar”. Azərbaycan Prezidenti sözləri onu əlavə etdi ki, Parisin Orli hava limanında terror hadisəsi törədən Karapetyan soyadlı şəxs sonradan Ermənistana ekstradisiya edilib və Ermənistan prezidenti tərəfindən əfv olunub. Dövlət başçısı bu faktı Paşinyana xatırlatdıqdan sonra mövzuya bu cümlə ilə yekun vurdu: “Məhz buna görə belə məsələlər ətrafında müzakirə gedəndə ona sakit oturmağı tövsiyə edərdim”.

Onlayn konfransa qatılan digər iştirakçılar Paşinyanın sayıqlamasına reaksiya vermədilər. Çünki, Şərq Tərəfdaşlığ Proqramında iştirak edən digər dövlət başçıları və Avropa İttifaqı komissarları Paşinyanın yalan danışdığını bilir və onlar birmənalı olaraq Azərbaycanın ərazi bütövlüyünə dəstək verirlər. Bu isə o deməkdir ki, həmin dövlət başçıları və Avropa İttifaqı Ermənistanın Azərbaycan torpaqlarının işğalı faktını danmırlar. Avropa Parlamentinin Azərbaycan, Gürcüstan və Ermənistan üzrə məruzəçilərinin bir neçə gün əvvəl Paşinyanın növbəti təxribattıyla bağlı yayınladıqları bəyanat da İrəvana sərt sillə mahiyyəti daşıyır. Avropalı deputatlar birmənnalı qeyd etdilər ki, Ermənistanın Azərbaycanın işğal altındakı rayonları üzərindən Dağlıq Qarabağa üçüncü yol çəkməsi təxribatdır və onlar Azərbaycanın ərazi bütövlüyünü birmənalı dəstəkləyirlər.

Bu arada, Azərbaycanın Avropa İttifaqı ilə əməkdaşlığı yüksələn xətt üzrə inkişaf edir. Azərbaycan bu vaxta qədər Avropa İttifaqının 9 ölkəsi ilə strateji tərəfdaşlıq sazişi imzalayıb. Yaxın perspektivdə Azərbaycanla Avropa İttifaqı arasında da strateji saziş imzalanacaq. Bu mənada prezident İlham Əliyev Avropa İttifaqı ilə sazişin imzalanması üzərində iş getdiyini və sənədin 90 fazinin razılaşdırıldığı barədə dediklərini xatırlatmaq yerinə düşər.

Adil Əliyev

Milli Məclisin deputatı