Boyukmillet.com Biz yanmasaq vətən yanar
Ukrayna Baş Prokururluğu Rusiyanı müharibə qanunlarını pozmaqda ittiham edir
Ukrayna Baş Prokurorluğu jurnalist Viktoriya Roşçinanın Rusiya əsirliyində ölməsi ilə bağlı araşdırmalara başlayıb.
Bu barədə oktyabrın 10-da Ukrayna Baş Prokurorluğu məlumat yayıb.
Məlumata görə, jurnalistin ölümü ilə bağlı Cinayət Məcəlləsinin 438-ci maddəsinin 1-ci hissəsi (müharibə qanunlarını pozma) ilə cinayət işi açılıb.
Viktoriya Roşçinanın ölümü oktyabrın 10-da məlum olub.
Ali Radanın deputatı Yaroslav Yurçişin bu haqda jurnalistin atası Vladimir Roşçinin Rusiya tərəfdən aldığı mesaja istinadən ilk dəfə danışıb.
Deputatın sözlərinə görə, Viktoriya Roşçina Taqanroqdan Moskvaya aparılarkən həyatını itirib.
V. Roşçinanın ölümünü Ukrayna Əsirlərinin Müalicəsi üzrə Koordinasiya Qərargahı da təsdiqləyib.
Qeyd olunur ki, jurnalist Lefortovo təcridxanasına aparılıb və Rusiya ilə məhbus mübadiləsi çərçivəsində vətənə qaytarılacaq.
Ukrayna Müdafiə Nazirliyinin Baş Kəşfiyyat İdarəsi Roşçina mübadiləsinin “yaxın gələcəkdə” keçirilməli olduğunu bildirib, lakin dəqiq nə vaxt olacağını açıqlamayıb.
Ukraynanın “Qrati” nəşrinin məlumatına görə, oktyabrın 10-da Roşçinanın atası Rusiya Müdafiə Nazirliyindən 2 oktyabr 2024-cü il tarixli məktub alıb:
“Jurnalistin ölüm tarixi sentyabrın 19-u göstərilir. Məktubda Roşçinanın ölümünün səbəbləri barədə məlumat verilmir. Ukrayna hakimiyyəti də jurnalistin necə öldüyünü bilmir. Rusiya tərəfi vəziyyəti şəkildə şərh etməyib. Oktyabrın 6-da Roşçinanın 28 yaşı tamam olacaqdı”.
Rusiyanın Ukraynaya genişmiqyaslı işğalı başlayandan Viktoriya Roşçina “Hromadske”, “Ukrainska Pravda”, “Azadlıq” radiosu və digər nəşrlər üçün reportajlar hazırlayıb.
2022-ci ilin martında o, Zaporojye vilayətinin cənubunda Berdyanskdan Mariupol (Donetsk vilayəti) istiqamətində hərəkət edərkən Rusiya FTB əməkdaşları tərəfindən saxlanılıb.
Jurnalist Rusiya kəşfiyyat xidmətinə qarşı heç bir şikayətinin olmadığını bildirən video bəyanatdan sonra sərbəst buraxılıb.
2022-ci ildə Beynəlxalq Qadın Media Fondu onu Jurnalistikada Cəsarət Mükafatı ilə təltif edib.
Sərhədsiz Reportyorlar (RSF) ukraynalı jurnalistin ölümü ilə bağlı araşdırma aparmağa çağırıb və qeyd edib ki, Rusiya hakimiyyəti Roşçinanın saxlanması və ölüm şəraitini ictimaiyyətə açıqlamalıdır.
Ukrayna Prezidenti Volodimir Zelenski Roma Papası Fransisklə görüşündə Viktoriya Roşçinanın ölümünü xatırladıb:
“İşğal olunmuş ərazilərdən hələ də çoxlu sayda jurnalist, ictimai xadim, icma liderləri, hətta Rusiya işğalı zamanı əsir götürülmüş sadə insanlar var”.
RSF qeyd edir ki, 2022-ci ilin fevralında genişmiqyaslı işğal başlayandan sonra 100-ə yaxın ukraynalı və beynəlxalq jurnalist Rusiyanın təcavüzündən əziyyət çəkib.
Rusiya hakimiyyəti onlardan 19-nu hələ də saxlayır.
Eyni zamanda, saxlanılan jurnalistlərin bəziləri barədə heç nə məlum deyil – Rusiya tərəfi hər hansı məlumat verməkdən imtina edir, təşkilat yazır.
