Boyukmillet.com Biz yanmasaq vətən yanar
Bəşəriyyət tarixinə öz adını qızıl hərflərlə yazdıran xalqların spesifik və unikal inkişaf yolu bir neçə cəhətdən nümunəvi xarakter daşıyır. Əvvəla tarixi faktlar təsdiqləyir ki, zəngin mədəniyyətə malik olmaq və öz milli-mədəni dəyərlərinə, tarixi keçmişinə sahib çıxmaq həmin xalqların davamlı nailiyyətlər qazanmasını və siyasi səhnədə layiqli yer tutmasını təmin edib.
Parlamentin Mətbuat və ictimaiyyətlə əlaqələr şöbəsindən bildirilib ki, bu fikirlər Milli Məclisin sədrinin müavini, Gənclər və idman komitəsinin sədri Adil Əliyevin “Şərəf salnaməsi və Zəfər dastanı” sərlövhəli məqaləsində yer alıb. Məqaləni təqdim edirik.
Reallıqlar bəhs olunan xalqların məhz güclü və qətiyyətli lider ətrafında birləşərək intibah və tərəqqiyə müvəffəq olduqlarını təsdiqləyir. Nəhayət, onların timsalında birlik – həmrəylik faktoru milli inkişafı təmin edən mühüm amil qismində çıxış edir. Heç şübhəsiz, bütün bu sadalananlar şanlı tarixi keçmişə malik olan Azərbaycan xalqının da milli portretinin əsas cizgilərini təşkil edir.
Şanlı tarix: xalqımızın milli qürur nümunəsi – iftixar mənbəyi
Heç şübhəsiz, XXI əsr xalqımızın çoxəsrlik tarixinin bənzərsiz və parlaq səhifəsini təşkil edir. Çünki bu yüzillikdə heç vaxt indiki qədər güclü olmayan Azərbaycan dövləti qlobal siyasi arenada davamlı yüksəlişə malik güclü dövlət, söz və nüfuzu sahibi olan mühüm aktor kimi özünü təsdiqləyib. Eyni zamanda, zəngin və unikal mədəniyyətə, milli iftixar nümunəsi olan şanlı tarixi keçmişə malik xalqımızın şərəfli inkişaf yolunun ən qürurverici səhifəsi, təbii ki, Vətən müharibəsində möhtəşəm qələbəmiz, ölkəmizin ərazi bütövlüyünün və tarixi ədalətin bərpa olunmasıdır. Azərbaycan xalqının bu Qələbə salnaməsi – Zəfər dastanı dövlətimizin qüdrəti, Müzəffər Ali Baş Komandanımızın siyasi iradəsi və milli həmrəyliyimiz sayəsində yaradılıb.
Yeri gəlmişkən, Azərbaycan Respublikasının Prezidenti İlham Əliyev Vaqif Poeziya Günlərinin rəsmi açılış mərasimində çıxışı zamanı bu kontekstdə çox mühüm məqamlara toxunaraq həm tarixi faktlara, həm də müasir reallıqlara nəzər saldı. Müzəffər Ali Baş Komandanımız 44 günlük Vətən müharibəsinin bizim şanlı tariximiz olduğunu bir daha xüsusi vurğulayaraq “Bu tarix əbədi yaşayacaq. Çünki bu Qələbə tarixdə bənzəri olmayan qələbədir. Azərbaycan xalqı buna layiq idi və biz Qələbə əldə edərək düşməni öz doğma diyarımızdan qovduq, şəhərlərimizi azad etdik, doğma Şuşamızı azad etdik”,-deyə diqqətə çatdırdı.
Məğrur və əzəmətli Şuşa əsl sahibinə qovuşdu
Şuşanın işğaldan azad olunması mənəvi, siyasi və strateji cəhətdən çox mühüm əhəmiyyətə malikdir. Çünki birincisi¸ Şuşanın Azərbaycan mədəniyyətinin ocağı kimi xalqımızın tarixində çox böyük rəmzi mənası və xüsusi yeri var. Şuşa, eyni zamanda, azərbaycanlı milli kimliyinin daşıyıcısı və tarixi simvoludur. Bu mədəniyyət mərkəzinin təməli XVIII əsrdə, daha dəqiq desək, 1752-ci ildə Pənahəli xan tərəfindən qoyulub. Əlamətdar haldır ki, illər sonra əsarətdən qurtulan – əsl sahibinə qovuşan Şuşanın gələn il 270-ci ildönümüdür. Heç şübhəsiz, Azərbaycan dövləti bu müstəsna tarixi təntənəli şəkildə qeyd edərək öz milli gücünü və mənəvi-siyasi iradəsini nümayiş etdirəcək, xalqımızın həmrəyliyi yenidən əzəmət simvoluna çevriləcək.
Digər tərəfdən, Şuşanın işğaldan azad olunması strateji amildir. Məlumdur ki, 1992-ci il mayın 8-də Şuşanın işğal edilməsi xalqımız üçün növbəti faciələrə səbəb olmuşdu. Şuşanın strateji əhəmiyyətinin itirilməsindən istifadə edən düşmən Laçını və Kəlbəcəri də işğal altına almış, beləliklə, Dağlıq Qarabağ Muxtar Vilayəti ilə Ermənistan arasında coğrafi bağlantı yaradılmışdı. 28 il sonra bu tarixi Azərbaycan torpağının işğaldan azad olunması Azərbaycanın regionda strateji mövqeyinin möhkəmlənməsinə imkan verməklə yanaşı, xalqımızın mənəvi-psixoloji üstünlüyünü də gücləndirmiş oldu.
Milli keçmişinə sahib çıxan Azərbaycan xalqı tarixi və mədəni dəyərlərini yaşadır
Azərbaycan Prezidentinin rəhbərliyi ilə Şuşada görülən işlər xalqımızın milli keçmişinə sahib çıxmaq, tarixi və mədəni dəyərləri yaşatmaq, Şuşanı sözün hər anlamında dirçəltmək baxımından çox önəmlidir. 2021-ci il 30 avqust tarixində mədəniyyət paytaxtımızda Azərbaycan şairi, dövlət xadimi, Qarabağ xanının vəziri Molla Pənah Vaqifin məqbərəsinin önündə Vaqif Poeziya Günlərinin açılışının keçirilməsi isə müstəsna tarixi hadisədir. Bu, eyni zamanda, milli qürur və ləyaqətin, eləcə də mənəvi dəyərlərimizin bərpasıdır. Bu, həmçinin tarixi irsə hörmət nümunəsidir.
Məlumdur ki, Molla Pənah Vaqifin məqbərəsinin Şuşada ucaldılması qərarını ulu öndər Heydər Əliyev verib. Ulu Öndərin təşəbbüsü ilə 1982-ci il yanvarın 14-də Şuşada qarlı, şaxtalı havada bu məqbərənin açılışı olub. SSRİ dövrünün mürəkkəb şərtləri daxilində, xüsusilə də ermənilərin bu tarixi şəhərimizə iddialar irəli sürdükləri bir vaxtda Ulu Öndərin iradəsi və qətiyyəti nəticəsində bu məqbərənin ucaldılması ilə bir daha Şuşanın Azərbaycan şəhəri olması öz təsdiqini tapıb. Yeri gəlmişkən, erməni vandalizminin nəticəsində dağıdılmış məqbərənin bərpasını Mehriban xanım Əliyevanın rəhbərlik etdiyi Heydər Əliyev Fondu öz üzərinə götürüb. Bütövlükdə, bu gün Vaqif Poeziya Günlərinin keçirilməsi Ümummilli Liderin layiqli davamçısı olan Prezident İlham Əliyevin siyasi iradəsi nəticəsində xalqımızın qürur tarixinin daha bir parlaq səhifəsinin yazılmasıdır.
Bunlarla yanaşı, ermənilər tərəfindən gülləbaran edilmiş dahi şəxsiyyətlərimizin – Xurşidbanu Natəvanın, Üzeyir Hacıbəylinin, Bülbülün büstlərinin gətirilməsi və mərkəzi meydanda qoyulması, Üzeyir Hacıbəylinin abidəsinin yenidən qoyulması, onun dağıdılmış evinin bərpası ilə bağlı göstəriş verilməsi və digər mühüm addımlar mədəni irsə və milli tarixə ehtiramın təzahürüdür.
Qarabağın tacı dirçələcək, yenidən inkişaf, intibah və tərəqqi məkanına çevriləcək
Şuşanın bərpası hazırda Azərbaycan dövlətinin qarşısında duran milli-strateji vəzifələrdən və mühüm prioritetlərdən biridir. Bu tarixi Azərbaycan şəhərinin bərpasına Prezident İlham Əliyevin cari il yanvarın 14-də Şuşaya etdiyi səfərdən sonra start verilib. Qısa müddət ərzində bu istiqamətdə əhəmiyyətli işlər görülüb, müasir infrastrukturun yaradılması ilə əlaqədar vacib addımlar atılıb. Bu gün fərəh və məmnunluq hissi ilə qeyd edə bilərik ki, Zəfər yolu artıq inkişafın və azad olunmuş torpaqlara həyatın qaytarılmasının rəmzinə çevrilib.
Bunlarla yanaşı, Şuşanın tarixi abidələrinin bərpasına start verilməsi, Heydər Əliyev Fondu tərəfindən üç məsciddə təmir-bərpa işlərinin aparılması, Natəvan bulağının bərpa edilməsi, “Xarıbülbül” və “Qarabağ” hotellərinin istifadəyə verilməsi və digərləri Azərbaycan dövlətinin siyasi iradəsini və iqtisadi gücünü nümayiş etdirir.
Bir sözlə, Azərbaycan xalqı Şuşaya müzəffər, qürurlu və qurucu xalq kimi qayıdıb. Əminliklə söyləmək olar ki, milli həmrəyliyimiz sayəsində Qarabağın tacı dirçələcək, yenidən inkişaf, intibah və tərəqqi məkanına çevriləcək!
