Boyukmillet.com Biz yanmasaq vətən yanar
ABŞ qoşunlarını Əfqanıstandan çıxardıqdan sonra Birləşmiş Ştatlar hərbi qüvvələrini terrorizmlə mübarizə aparmaq üçün yenidən bu ölkəyə göndərməyi planlaşdırmır.
Boyukmillet.com TASS-a istinadən xəbər verir ki, bu barədə Pentaqonun mətbuat katibi Con Kirbi bildirib.
“Amerika hərbi qulluqçularının (Əfqanıstana-red) təkrar göndərilməsi ilə bağlı heç bir plan yoxdur”, – Kirbi bununla bağlı suala cavab verərək deyib.
Aprelin 14-də ABŞ prezidenti Cozef Bayden Birləşmiş Ştatların Əfqanıstanda öz missiyasını yerinə yetirdiyini və mayın 1-dən ABŞ qoşunları çıxarmağa başlayacağını bildirib. Onun sözlərinə görə, qoşunların çıxarılması 11 sentyabra qədər başa çatacaq.
2020-ci ildə ABŞ və Əfqanıstanın radikal “Taliban” hərəkatı 18 illik müharibədən sonra sülh razılaşmasını imzalayıblar. Razılaşmaya əsasən, Amerika qoşunları 1 maya qədər Əfqanıstanı tərk etməlidir. ABŞ-ın hazırkı prezidenti Cozef Bayden administrasiyası “taliblər”lə razılaşmaları təkrar gözdən keçirmək niyyəti haqqında bildirib.
Amerikanın Əfqanıstanda hərbi əməliyyatı 2001-ci ilin 11 sentyabr terror aktına cavab olaraq başlanmışdı.
