Boyukmillet.com Biz yanmasaq vətən yanar
“Büdcə sənədinin detalları haqqında dünən və bu gün ətraflı danışıldı. Buna görə də təkrarçılığa yol verib vaxtınızı almaq istəmirəm. Ancaq qısa olaraq hazırkı iqtisadi duruma və 2018-ci ilin büdcə layihəsinə qiymət versək, asanlıqla deyə bilərik ki, cənab Prezident İlham Əliyevin atdığı cəsarətli addımlar, qəbul etdiyi təxirəsalınmaz qərarlar və həyata keçirdiyi islahatlar öz bəhrəsini verdi. Hökumət qarşımızda duran ən çətin vəzifənin öhdəsindən gələ bildi”.
Bunu Milli Məclisdə 2018-ci ilin büdcə layihəsinin müzakirəsi zamanı çıxış edən Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının sədri, millət vəkili Azay Quliyev bildirib.
Millət vəkili vurğulayıb ki, iqtisadiyyatda ciddi geriləmənin qarşısı alınıb, ölkənin maliyyə və iqtisadi sektorunda sabitləşmə və post-neft dönəminə adaptasiya dövrü başlayıb:
“Ən mühüm məsələlərdən biri – manatın sonrakı devalvasiyasının qarşısı alındı və milli valyutamıza olan inamın bərpa olunması istiqamətində önəmli addımlar atıldı. Məhz bunun nəticəsidir ki, artıq gələn il ölkə iqtisadiyyatında 1.5% artım gözlənilir. Beynəlxalq Valyuta Fondu (BVF) da Azərbaycan iqtisadiyyatının 1.3% böyüyəcəyi qənaətindədir. Halbuki BVF MDB ölkələrindən Belarusiya üçün 0.7%, yaxud neft ölkələri olan Venesuela üçün mənfi 6%, Səudiyyə Ərəbistanı üçün isə cəmi 1.1% dinamika proqnozlaşdırır.
Məhz bu iqtisadi böyümənin və görülən əlavə tədbirlərin nəticəsidir ki, 2018-ci il üçün dövlət büdcəsinin gəlirlərində 20.3%, xərclərində isə 16.5% artım nəzərdə tutulur. Şübhəsiz ki, kifayət qədər əhəmiyyətli artımdır və hökumətin ciddi uğuru sayılmalıdır.
Əlbəttə, vaxt imkan versəydi, büdcədə ayrı-ayrı istiqamətlər üzrə müsbət məqamları da sadalamaq olardı. Lakin buna imkan yoxdur. Lakin 2018-ci ilin büdcə layihəsində vətəndaşın güzəştli şərtlərlə mənzil əldə etməsi imkanlarının artırılması məqsədilə 250 milyon manat vəsaitin ayrılmasını və ilk dəfə yaradılan İşsizlikdən Sığorta Fondunun büdcəsinin formalaşmasını və xərclənməsi istiqamətlərinin müəyyənləşməsini xüsusi qeyd etmək yerinə düşər. Hökumətin bu addımını yüksək qiymətləndirirəm”.
A.Quliyev büdcə layihəsi ilə bağlı bir sıra təkliflər səsləndirib: “Birinci məsələ, səfirliklərimizin maliyyə və texniki təchizatının yaxşılaşdırılmasına ehtiyac var. Bu gün səfirliklərdə milli bayramların, tarixi hadisələrin və bir çox digər mühüm tədbirlərin keçirilməsinə vəsait çatışmır. 2016-cı ildən isə bütün səfirliklərin ştat cədvəlində sürücü ştatı ixtisara salınıb. Heç olmasa, hərəsinə bir sürücü ştatı verilsin. Təsəvvür edin ki, bəzən səfir özü sürücü funksiyasını yerinə yetirməyə məcbur olur. Axı, onlar ölkəmizi təmsil edirlər və bu sahəyə məncə, ciddi diqqət vermək lazımdır. Digər bir problem, diplomatik xidmətdə olan vətəndaşlarımızın xarici ölkədə işlədiyi dövrlər pensiya təminatına daxil edilmir. Diplomatın pensiyası xaricdə işlədiyi dövrdə aldığı əmək haqqından deyil, XİN-də son dəfə aldığı əmək haqqının 50 faizindən hesablanır və nəticədə çox az miqdarda pensiya ilə təmin olunur. Bu məsələyə də baxılsa, yaxşı olar”. (azvision.az)
