Deputat: “Ərdoğanın hər gəlişi ölkəmizə böyük sevinc gətirir, gücümüzə güc qatır”

“Türkiyə Prezidenti Rəcəb Tayyib Ərdoğan bir daha doğma vətəninə, türk dünyasının tacı olan Azərbaycana gəlib. Onun hər gəlişi ölkəmizə böyük sevinc gətirir, gücümüzə güc qatır, niyyətlərimizi stimullaşdırır”.

Boyukmillet.com xəbər verir ki, bu fikirləri Milli Məclisin deputatı Fəzail Ağamalı parlamentin növbədənkənar sessiyası çərçivəsində iyunun 13-də keçirilən plenar iclasında çıxışı zamanı deyib.

“Bu, tamamilə fərqli səfərdir. Böyük güclərin üzərində möhtəşəm qələbə qazanan Ərdoğan yeni güclə Türkiyə xalqının və türk dünyasının iradəsinə söykənərək bəşəriyyətə daha əhəmiyyətli töhfələr verəcək. Etiraf edim ki, Ərdoğanın qələbəsi tək Türkiyə xalqının deyil, eləcə də türk dünyasının və regionda sülhü və əmin-amanlığı dəstəkləyən hər bir bəşəri dəyərlərin özünə ifadə edən insanın qələbəsi kimi dəyərləndirilməlidir”, – o, bildirib.