Boyukmillet.com Biz yanmasaq vətən yanar
Şuşada Bülbülün ev muzeyinin həyətində Diaspor Gənclərinin III Yay Düşərgəsinin iştirakçıları ilə görüşən mədəniyyət və incəsənət xadimləri təəssüratlarını bölüşüblər.
Diasporla İş üzrə Dövlət Komitəsindən “Report”a verilən məlumata görə, “Azərbaycanfilm” kinostudiyasının baş redaktoru, kinoşünas, kinorejissor, əməkdar incəsənət xadimi Ayaz Salayev düşərgənin çox faydalı tədbir olduğunu bildirib:
“Bu tədbir çox gözəl təşkil olunub, hər şey nəzərə alınıb. Təəccüblü və inanılmaz bir hissdir – bütün dünyadan azərbaycanlı gənclər Şuşaya qonaq gəlib. Mən burada Meksikadan, Almaniyadan, hətta Pakistandan olan gənclərlə tanış oldum. Bu tədbir sayəsində bu gənclər tarixi vətənlərinə daha sıx bağlanırlar. Onlar başqa ölkələrin vətəndaşları olsalar da, özlərini azərbaycanlı hesab edirlər. Bu fakt Azərbaycan diasporunun formalaşmasında mühüm rol oynayacaq. Bu düşərgənin Şuşada keçirilməsi rəmzi xarakter daşıyır və təqdirəlayiq haldır”.
Azərbaycanın xalq artisti, kinoaktyor Şamil Süleymanlının fikrincə, istənilən tədbirin Şuşada keçirilməsi onun əhəmiyyətini daha da artırır: “Bu baxımdan Diasporla İş üzrə Dövlət Komitəsi və Heydər Əliyev Fondu tərəfindən xaricdə yaşayan gənclər üçün düşərgənin Şuşada təşkil olunması təqdirəlayiq haldır. Xaricdə yaşayan azərbaycanlı gənclərin Şuşada bir araya gəlməsi, burada onlara müxtəlif dərslərin keçirilməsi, tanınmış alimlərlə, mədəniyyət xadimləri ilə görüşlərin təşkil olunması, Azərbaycan mədəniyyətinin təbliğ olunması böyük işdir. Bu gənclər natiqlərə çox diqqətlə qulaq asırlar. Gözlərindəki sevinci – Şuşada olmaq sevincini görmək olur. Çünki Şuşanın küçələrində gəzmək, daşına-toprağına toxuna bilmək, böyük Bülbülün həyətində gəzmək, oradakı quyudan su içmək, Şuşada dərindən və doyunca nəfəs almaq.. Bu, şans deyil, böyük xoşbəxtlikdir”.
Azərbaycan Rəssamlar İttifaqının üzvü, rəssam Zöhrab Dadaşov da hesab edir ki, Diaspor Gənclərinin III Yay Düşərgəsinin mənəvi dəyəri çox böyükdür: “Bu düşərgə sayəsində xaricdə doğulub böyüyən və yaşayan gənclərdə Azərbaycan haqqında dolğun fikir formalaşır. Bu, mənim Şuşaya ilk gəlişimdir. Çox gözəl hisslər keçirirəm, təəssüratlarımı sözlə ifadə edə bilmirəm. Dünyanın müxtəlif ölkələrində yaşayan gənclərin də mənim kimi çox gözəl hisslər keçirdiyini düşünürəm. Mən də tədbir çərçvivəsində gənclərlə görüşdüm və görüşümüz çox maraqlı keçd. Onlar arasında rəssamlığa, incəsənətə meylli olanlar az deyildi. Azərbaycanın müasir incəsənəti, incəsənət tarixi barədə sual-cavab oldu, gənclərlə çox gözəl diskussiya alındı. Gənclərin həm davranışları, həm də verdiyi suallardan bəlli olur ki, onların düşərgəyə seçilməsi prosesi çox yaxşı təşkil olunub. Bir məqamı xüsusilə vurğulamaq istəyirəm ki, gənclərin əksəriyyəti ana dilimizdə çox səlis danışırdı. Bu sevindirici hal idi”.
Qeyd edək ki, Diaspor Gənclərinin III Yay Düşərgəsi Diasporla İş üzrə Dövlət Komitəsi və Heydər Əliyev Fondunun birgə təşkilatçılığı ilə 2022-ci ilin 2-8 avqust tarixlərində gerçəkləşdirilir. Düşərgənin tərəfdaşları Azərbaycan Respublikasının Gənclər və İdman Nazirliyi, Gənclər Fondu, Dövlət Turizm Agentliyi və Şuşa Şəhəri Dövlət Qoruğu İdarəsidir.
Layihədə 50 ölkəni təmsil edən 115 nəfər iştirak edir. Onların arasında həm dünyanın müxtəlif ölkələrində yaşayan azərbaycanlılar, həm də Azərbaycana dost münasibəti bəsləyən xalqların nümayəndələri var. Layihənin xalqımızın Qarabağda parlaq qələbəsindən və Dünya Azərbaycanlılarının V (Zəfər) Qurultayından sonraya təsadüf etməsi xüsusi önəm daşıyır.
2022-ci il aprelin 22-23-də Şuşada keçirilən Dünya Azərbaycanlılarının V Qurultayında Azərbaycan Prezidenti, Müzəffər Ali Baş Komandan İlham Əliyev xaricdə yaşayan azərbaycanlıları hər zaman tarixi Vətənlə əlaqələrini kəsməməyə, vaxtaşırı Azərbaycana səfər etməyə, ana dilini unutmamağa, Azərbaycan tarixini və mədəniyyətini öyrənməyə, Azərbaycan həqiqətlərini dost xalqların diasporları ilə birlikdə təbliğ etməyə çağırıb. Bu mənada Diaspor Gənclərinin Yay düşərgələri Azərbaycan Prezidentinin tövsiyələrinin gerçəkləşdirilməsi kimi də qiymətləndirilə bilər.
Xatırladaq ki, Diaspor Gənclərinin I Yay Düşərgəsi “Cümhuriyyətin 100 illiyi” şüarı altında Şəkidə, “Nəsimi-650” II Yay Düşərgəsi isə 2019-cu ildə Şamaxıda keçirilib.
