Dünya Azərbaycanlıları Konqresindən dünyada yaşayan bütün soydaşlarımıza müraciəti

28 Oktyabr 2020 Dünya

Azərbaycan Respublikasının öz ərazi bütövlüyünü təmin etmək və işğalçı Ermənistan qoşunlarını Qarabağdan çıxarmaq üçün əks hücum əməliyyatı apardığı bu günlərdə dünyada yaşayan bütün azərbaycanlılar doğma vətənlərinin səsinə səs verdilər.Azərbaycan dövlətinə mənəvi dəstək oldular.Bütün milli missiyalarda olduğu kimi bu prosesdə də Dünya Azərbaycanlıları Konqresinin üzvləri fəallıqları ilə seçilirlər.

DAK İdarə Heyəti Konqresin bütün üzvlərini Azərbaycanın, Türkiyənin və dost ölkələrin bütün diaspor təşkilatı ilə əlaqələri möhkəmləndirərək yaşadıqları ölkələrdə Azərbaycanın haqlı mövqeyini daha ardıcıllıq və əzmkarlıqla müdafiə və təbliğ etməyə çağırır. Nəzərə alınmalıdır ki:

Hərbi əməliyyatlara Ermənistan başlayıb və danışıqlar prosesini pozub.
Azərbaycan müstəqil dövlət olaraq öz suveren hüquqlarını qoruyur, onun mövqeyi BMT Təhlükəsizlik Şurasının qətnamələrinə əsaslanır.
Azərbaycan öz ərazisində, torpaqlarını işğalçıdan, terrorçulardan təmizləmək uğrunda savaşır və heç bir ölkəyə qarşı ərazi iddiası yoxdur.
Ermənistan münaqişənin sərhədini genişləndirmək və üzvü olduğu Kollektiv Təhlükəsizlik Müqaviləsinə imza atmış ölkələri də müharibəyə cəlb etmək məqsədilə Ermənistan ərazisindən qadağan olunmuş silahlardan müharibə bölgəsindən xeyli aralıda yerləşən Azərbaycanın şəhərlərini atəşə tutur. Ermənistandan atılan raketlər Gəncədə, Bərdədə xeyli sayda dinc əhalinin, uşaqların, qadınların, yaşlıların ölümünə səbəb olmuşdur, yaşayış məhəllələri, dövlət müəssisələri və iaşə obyektləri dağıdılmışdır. Bu, beynəlxalq konvensiyalara ziddir və hərbi cinayətdir.
Türkiyə Azərbaycanın ən yaxın müttəfiqi və dostudur, lakin Azərbaycana yalnız siyasi dəstək verir.
Ermənistan Avropanın enerji təhlükəsizliyində mühüm rol oynayan enerji xətlərini və infrastrukturları hədəf seçir.
ATƏT-in Minsk qrupunun üzvü olan ölkələr hələ də öz ermənipərəst mövqelərindən əl çəkməmişlər və dolayı yolla Ermənistanı müdafiə edir, onun silahlandırılmasına göz yumurlar. Bir sıra ölkələr mülkü təyyarələrlə Ermənistana silah daşımağa ara vermirlər.
Azərbaycan atəşkəsə, məsələnin danışıqlar yolu ilə tamamlanmasına etiraz etmir və bununla bağlı prezident İlham Əliyev öz şərtlərini irəli sürmüşdür.
Bu savaşda Azərbaycan dövləti yalnız hərbi obyektləri hədəf seçir və Dağlıq Qarabağın erməni əhalisi müharibədən sonra öz evlərinə qayıdan azərbaycanlılarla bərabər dinc həyatlarını davam etdirə bilərlər.
Qonşu İranla sərhəd rayonlarında gedən hərbi əməliyyatlar artıq tamamlanmışdır. Azərbaycan və İran arasında beynəlxalq səviyyədə tanınmış sərhəd bərpa edilmişdir və İranın rahatsızlığına heç bir əsas yoxdur. Təəssüf ki, İran rəsmiləri Azərbaycanın torpaq bütövlüyünü müdafiə etsələr də, bu ölkənin ərazisindən Ermənistana yardımlar dayandırmamışdır.
Azərbaycan ordusu qələbəyə yaxındır. Azərbaycan öz torpaq bütünlüyünü bərpa edəcək və Qarabağdan çıxarılmış bir milyon azərbaycanlı öz doğma yurdlarına qayıdacaqdır.
Qarabağ Azərbaycandir!

DAK həmsədrləri
Sabir Rüstəmxanlı
Firudin Pərvizliya

Boyukmillet.com

Boyukmillet.com Biz yanmasaq vətən yanar

Dünya Azərbaycanlıları Konqresindən dünyada yaşayan bütün soydaşlarımıza müraciəti

Check Also

Abxaziyada: Aksiya keçirilən ərazidə atəş səsləri eşidilib