Boyukmillet.com Biz yanmasaq vətən yanar
Baydenlə Makron əməliyyatların dayandırılması ilə bağlı bəyanat yayıb
İsrail və “Hizbullah”ın hərbi əməliyyatları dayandırmaq barədə razılığa gəldiyi bildirilir.
Münaqişənin hər iki tərəfinin atəşkəsə razı olması faktı ABŞ və Fransa prezidentləri Co Bayden və Emmanuel Makronun birgə bəyanatında yer alıb.
Co Bayden keçirdiyi brifinqdə razılaşmanın şərtlərini açıqlayıb.
ABŞ Prezidentinin sözlərinə görə, hər iki tərəf noyabrın 27-də, bu gün atəşi dayandırmağa razılaşıb.
Bundan əlavə, İsrail 60 gün ərzində Livanın cənubundan qoşunlarını çıxaracaq və “Hizbullah” silahlıları sərhəd bölgələrini tərk edərək Livan ordusuna yol verəcək.
““Hizbullah”, yaxud da başqa kimsə müqaviləni pozub, birbaşa təhlükə törətsə, İsrailin hələ də özünümüdafiə hüququ var”, – ABŞ Prezidenti əlavə edib.
Bayden qeyd edib ki, atəşkəs təklifi ABŞ tərəfindən verilib.
Onun sözlərinə görə, İsrail və Livanın baş nazirləri təklifi qəbul ediblər.
ABŞ Prezidenti deyib ki, ölkə Livan-İsrail sərhədində qoşun yerləşdirməyəcək və bufer zonanın yaradılması da nəzərdə tutulmayıb.
Eyni zamanda, ABŞ, Fransa və digər ölkələr münaqişə tərəflərinə lazımi yardımı göstərəcək.
“BBC”nin məlumatına görə, İsrail və Livan arasında döyüşlər gecə saatlarına qədər davam edib.
“Hizbullah” Təl-Əvivdəki hərbi hədəflərə pilotsuz təyyarələr atdığını və İsrail ordusunun atəşkəsdən bir saatdan az əvvəl Beyrutun cənub ətrafına hücum etdiyini bildirib.
Üstəlik, atəşkəsin rəsmi başlanmasından sonra döyüşlər səbəbindən evlərini tərk etmək məcburiyyətində qalan Livanın cənubunda yaşayan sakinlər İsrail hərbçilərinin buna tələsməmək çağırışlarına baxmayaraq, evlərinə qayıtmağa başlayıblar.
Fələstinin “HƏMAS” qrupu atəşkəs razılaşmasını alqışlayıb və oxşar saziş bağlamağa hazır olduğunu bəyan edib.
Bu barədə “France-Presse” hərəkatın nümayəndəsinə istinadən xəbər verib.
“Yaxın günlərdə Birləşmiş Ştatlar Qəzzada atəşkəsə nail olmaq üçün Türkiyə, Misir, Qətər, İsrail və başqalarına qoşulacaq”, – Bayden bildirib.
O, “HƏMAS”ı 2023-cü ilin oktyabrında İsrailə hücumu zamanı götürdüyü girovları azad etməyə çağırıb.
“Hizbullah” 2023-cü il oktyabrın 7-də HƏMAS-ın ölkəyə hücumundan qısa müddət sonra İsraili atəşə tutmağa başlayıb.
Buna cavab olaraq İsrail qüvvələri Livan qruplaşması ilə əlaqəli hədəflərə hücum edib.
2024-cü ilin oktyabrında İsrail ordusu Livanın sərhəd bölgələrində “məhdud” quru əməliyyatına başladığını elan edib.
İsrail Müdafiə Qüvvələri sərhədə yaxın “Hizbullah” qurğularını İsrailin şimalındakı icmalar üçün “qabaqda təhlükə” yaradan hədəflər kimi müəyyən edib.
