Boyukmillet.com Biz yanmasaq vətən yanar
Seçki dairələri üzrə namizədlərin etirazları davam etməkdədir.Növbəti etiraz 12 saylı Qaradağ-Binəqədi-Yasamal seçki dairəsindən gəldi.Bu dairə üzrə 6 namizəd seçkinin tanınmaması ilə bağlı birgə bəyanat imzalayıb. Boyukmillet.com etiraz bəyanatını təqdim edir:
12 saylı Qaradağ-Binəqədi-Yasamal seçki dairəsindən 9 fevral 2020-ci il Azərbaycan Respublikası Milli Məclisinə növbədənkənar seçkilər üzrə qeydə alınmış namizədlər olaraq, bəyan edirik ki, seçki günü aktiv müşahidə etdiyimiz ciddi qanun pozuntuları, “karusellər”, 340 saylı hərbi hissənin əsgərlərinin seçkidə iştirak edib kütləvi saxta səs verməkləri, müşahidəçilərin seçkini izləmək imkanlarının məhdudlaşdırılması, müşahidəçilərə təzyiq göstərilməsi, müşahidəçilərin söyüş və təhqir edilməsi, səsvermə hüququ olmayan şəxslərin kütləvi şəkildə mənzil istismar sahələrindən, Qəsəbə nümayəndəliyi tərəfindən alınan saxta arayışlar əsasında səsvermədə iştirakı, bülletenlərin sayılması prosesindən müşahidəçilərin kənarlaşdırılması və protokolların surətlərinin seçki qanunvericiliyinə uyğun olaraq verilməməsi, qapalı həbsxanalardakı məntəqələrin namizədlərin məlumatı olmadan dislokasiyaya daxil edilməsi və saxta səslərin alınması halları tərəfimizdən aşkar olunub. Yuxarıda qeyd olunanları sübüt edən çoxsaylı aktlar və video görüntülər var.
Yuxarıda göstərilənləri nəzərə alaraq, 12 saylı Qaradağ-Binəqədi-Yasamal seçki dairəsində total saxtakarlıq və qanun pozuntuları şəraitində keçirilən seçkilərin seçicilərin iradəsinin nəzərə alınmadığını qeyd etməklə, seçkilərin nəticələrini rəsmi qaydada tanımadığımızı bəyan edir, saxtakarların cəzalandırılmasını, qapalı həbsxanalardakı məntəqələri dislokasiyadan çıxarılmasını və yenidən seçki keçirilməsini tələb edirik.
Qoşma: 12 saylı Qaradağ-Binəqədi-Yasamal seçki dairəsi üzrə
məntəqə komissiyalarının möhürləyib, imzalayıb
müşahidəçilərə təqdim etdiyi protokollarla MSK-nın
elektron səhifəsindən əldə edilmiş protokolların müqayisəli
cədvəli (ən çox səs toplayan 8 namizədin səsləri)
Qeydə alınmış namizədlər:
Babayeva Pərvin
İbrahimov Eltun
Kərimli Kərim
Mütəllimov Orxan
Rzayev Şamil
Şirinova Aidə
