Şəhid Toğrul Məmmədova həsr edilmiş “Qeyrət təcəssümü” kitabının təqdimatı keçirilib

Ağdam rayonunun Quzanlı qəsəbəsində şəhid Toğrul Məmmədova həsr edilmiş “Qeyrət təcəssümü” kitabının təqdimatı olub. Kitabın müəllifi şairə-publisist, “Vətən fədailəri” layihəsinin rəhbəri Manya Səxavətqızıdır. Tədbirdə şəhidin doğmaları, rayon icra hakimiyyətinin, ictimaiyyətin nümayəndələri, şəhid ailələrinin üzvləri, qazilər və ziyalılar iştirak ediblər.

Boyukmillet.com xəbər verir ki, Muğam Mərkəzində keçirilən tədbirdə əvvəlcə Azərbaycanın Dövlət himni səsləndirilib, Ümummilli Lider Heydər Əliyevin və respublikamızın ərazi bütövlüyü uğrunda canından keçən Vətən övladlarının xatirəsi bir dəqiqəlik sükutla yad olunub.

Tədbirdə çıxış edənlər xalqımızın erməni işğalçılarına qarşı mübarizəsindən, şəhid Toğrul Məmmədovun şərəfli ömür və döyüş yolundan danışıblar. Bildirilib ki, Məmmədov Toğrul Səyyad oğlu 1988-ci il iyulun 26-da Naxçıvan Muxtar Respublikasının Babək rayonunun Şıxmahmud kəndində anadan olub. 2005-ci ildə Azərbaycan Ali Hərbi Məktəbinə qəbul olan Toğrul mühəndis-istehkam ixtisasını seçib. Hərbi təhsilini uğurla başa vurduqdan sonra Ağdam rayonunda yerləşən N saylı hərbi hissədə xidmətə başlayıb. 2012-ci ildə baş leytenant hərbi rütbəsinə layiq görülüb. Hər zaman ön cəbhədə düşmənlə üz-üzə xidmət edən Toğrul öz sahəsi üzrə Azərbaycan Ordusunun ən peşəkar zabitlərindən biri olub və çoxsaylı döyüş əməliyyatlarının yerinə yetirilməsində, o cümlədən 2016-cı il Aprel döyüşlərində iştirak edib. Yaralı olmasına baxmayaraq, bunu gizlədib və döyüşlərdə sona qədər mübarizə aparıb. Həmin döyüşlərdə bir çox silahdaşı, o cümlədən briqada komandiri Raquf Orucov və dostu Nəcməddin Savalanov şəhid olub. Nəcməddin Savalanovun dəfnində qisas andı içən Toğrul bir neçə ay sonra düşməndən qisasını alıb. Yenicə kapitan rütbəsinin veriləcəyi sevincini yaşasa da, o rütbəni daşımaq qisməti olmur. Toğrul Məmmədov 2016-cı il iyulun 14-də Ağdam rayonunun Baş Qərvənd kəndində düşmənin təxribatının qarşısını alarkən qəhrəmancasına şəhid olub. Nəşi Babək rayonunun Şıxmahmud kəndində torpağa tapşırılıb. Prezident İlham Əliyevin Sərəncamı ilə şəhadətindən sonra “Hərbi xidmətdə fərqlənməyə görə” 3-cü dərəcəli medalı ilə təltif edilib.

Çıxışlarda xalqımızın şəhidlərimizin xatirəsinə hər zaman yüksək ehtiram göstərdiyi vurğulanıb, dövlətimizin başçısı tərəfindən şəhidlərin xatirəsinin əbədiləşdirilməsinin, onların ailə üzvlərinin və qazilərimizin sosial qayğılarının həllinin daim diqqət mərkəzində saxlanıldığı diqqətə çatdırılıb.

Toğrul Məmmədovun dostları, döyüş yoldaşları onunla bağlı xatirələrini bölüşüblər.

“Qeyrət təcəssümü” kitabının müəllifi Manya Səxavətqızı və şəhidin qardaşı Üzeyir Məmmədov nəşrin ərsəyə gəlməsində rolu olan şəxslərə, tədbirin təşkilatçılarına və iştirakçılara təşəkkürlərini ifadə ediblər.

Məktəblilər Manya Səxavətqızının şəhid Toğrul Məmmədova həsr etdiyi şeirləri söyləyiblər.

Sonda iştirakçılara “Qeyrət təcəssümü” kitabı hədiyyə olunub.