Boyukmillet.com Biz yanmasaq vətən yanar
Almaniyada fəaliyyət göstərən Münster Azərbaycan Evinin təşkilatçılığı və Dünya Azərbaycanlıları Konqresinin dəstəyi ilə Almaniyada “Güney Azərbaycanın dünəni və bu günü” mövzusunda konfrans keçirilib.
Boyukmillet.com xəbər verir ki, konfrans iştirakçıları əvvəlcə İranda baş verən etirazlarda öldürülən soydaşlarımızla, Vətən müharibəsində şəhid olanların xatirələrini sükutla yad edib.
Daha sonra Güney Azərbaycanın himni səsləndirilib və bununla da konfrans açıq elan olunub.
Aşılışı nitqində çıxış edən Almaniyanda Münster şəhərində fəaliyyət göstərən Azərbaycan Evinin rəhbəri Eldar Güneyli son 3 ayda İranda – Güney Azərbaycanda baş verən hadisələr barədə ətraflı məlumat verib.
Daha sonra Dünya Azərbaycanlıları Konqresinin (DAK) həmsədri Firudin Prəvizniya, DAK İH üzvü Nurəddin Qərəvi, DAK icra aparatının rəhbəri, İSBAM rəhbəri Samir Adıgözəlli, DAK Avropa rəhbəri Əli Hacı, Münster Azərbaycan Evinin təmsilçiləri Əhməd Urmulu, Elsevər xanım Ərdəbilli, Bəhrəm Nəsibli, Rza Babai, Əbülfəz Corabcı, Vahid Tazen, Əli Quşçu, eyni zamanda, Almaniyanın Köln, Frankfurt və digər şəhərlərindən, həmçinin Bolqarıstan və digər ölkələrdən gələn güneyli ziyalılar çıxış edərək, İranın mövcud rejiminin həyata keçirdiyi amansız zorakılığına, dinc əhaliyə qarşı qəddarlığına, soydaşlarımızın ən təməl haqq və hüquqlarının ayaqlar altına atmasına və digər acı gerçəkliklərə diqqəti çəkiblər.
Natiqlər bildirib ki, son üç ayda İranda yaşanan etiazlarda insanların təməl haqları kobud formada pozulmaqla, onlara qarşı ən qəddar və hətta əxlaqsız üsullardan yararlanmaqla, mövcud rejim bütün beynəlxalq qanunları bu gün də pozmaqda davam edir.
DAK İcra Aparatının rəhbəri Samir Adıgözəlli çıxışında İranda son aylar baş verən etirazların səbəblərini geniş təhlil edib. O, Azərbaycan prezidenti İlham Əliyevin güneyli soydaşlarımızın haqq və hüquqlarının hər platformada daim müdafiə olunacağı barədə son fikirlərinə geniş şərh verib: “Ölkə başçımız, cənab ilham Əliyevin “harada yaşaçmalarından asılı olmayaraq bütün azərbaycanlıların müdafiəsi bizim borcumuzdur” sözləri bizim üçün mühüm istiqamətdir. Bilirsiniz ki, prezident bu bəyanatı Türk Dövlətləri Təşkilatının son iclasında verib. Ötən gün isə Bakıda keçirilən ““Orta Dəhliz boyunca: geosiyasət, təhlükəsizlik və iqtisadiyyat” mövzusunda beynəlxalq konfransda da cənab prezident İlham Əliyev İranda yaşayan soydaşlarımızın təhsil haqqlarının, ana dili hüququları barədə çox vacib mesajlar verib. Eyni zamanda, İranın mövcud rejiminin Azərbaycana qarşı apardığı siyasətə toxunub və ölkəmizə, soydaşlarımıza qarşı nifrət üzərində aparılan fəaliiyətin səmərə verməyəcəyini deyib. Şübhəsiz ki, Prezident tamamilə haqlıdır. Bu gün bütün azərbaycanlılar bir yumruq kimi birləşərək, Prezidentin arxasında durmaqla, onun göstərdiyi istiqamətlərdə fəaliyyət göstərməkdəyik. Qoy cənab Prezidentin dediyi kimi, bütün düşmənlərimiz görsün ki, biz heç kimdən çəkinmirik…”:
Konfransın sonunda İranda baş verənlərlə bağlı bəyanat qəbul olunub.
Qərara alınıb ki, yaxın günlərdə Avropanın digər ölkələrində Güney Azərbaycanda baş verən proseslərlə bağlı yeni-yeni tədbirlərin təşkil olunması, müzakirələrin aparılması və bununla da İranda yaşanan zorakılığa daha çox diqqətin cəlbi istiqamətində sistemli fəaliyyət artırılsın.
