Boyukmillet.com Biz yanmasaq vətən yanar
İnsan Haqları Naminə Beynəlxalq Tərəfdaşlıq (IPHR) və “Truth Hounds” QHT-lərinin ötən ilin may ayında açıqladığı birgə hesabata əsasən, erməni silahlı qüvvələrinin üzvlərinin iki yaralı və əsir götürülmüş azərbaycanlı döyüşçünü qanunsuz olaraq edam etdiyinə dair ilkin sübutlar var.
Boyukmillet.com xəbər verir ki, bu barədə ABŞ Dövlət Departamentinin 2021-ci il üçün İnsan Haqları Praktikası üzrə Ölkə Hesabatında qeyd olunub.
Bildirilib ki, məsələ ilə əlaqədar sübutlar iki videodan ibarətdir və bu qətllər əlavə istintaqla təsdiqlənərsə, Beynəlxalq Humanitar Qanuna əsasən, həyata və şəxsə qarşı zorakılıq qadağasının açıq şəkildə pozulması, eləcə də Cenevrə Konvensiyasının ciddi şəkildə pozulması sayıla bilər: “Yaralı Azərbaycan əsgərlərinin öldürülməsi eynilə Ermənistan Cinayət Məcəlləsinin pozulması, Avropa İnsan Hüquqları Konvensiyasının (nəzərdə tutduğu-red.) yaşamaq hüququnun kobud şəkildə pozulması anlamına gələr”.
Dövlət Departamentinin sənədində qeyd olunub ki, IPHR və “Truth Hounds” təşkilatlarının birgə hesabatında keçmiş azərbaycanlı əsirlərlə müsahibələr və əsirlərdən birinin zorakılığa məruz qalmasını əks etdirən video əsasında ən azı 7 azərbaycanlı hərbi əsirin Ermənistan hərbçiləri və separatçıları tərəfindən işgəncəyə, qəddar, qeyri-insani və ya ləyaqəti alçaldan rəftara məruz qalması müəyyən olunub.
Vurğulanıb ki, bu, IPHR və “Truth Hounds” tərəfindən müstəqil şəkildə təsdiqlənməsə də, azərbaycanlı əsirlərlə pis rəftarla bağlı üç hadisə videoya çəkilib və bu hadisələrin əlavə araşdırmaya ehtiyacı var.
Vurğulanıb ki, sonuncu hallardan birində pis rəftarın azərbaycanlı hərbi əsirin ölümü ilə nəticələnmiş ola biləcəyi mümkündür.
Hesabata görə, şahidlər tərəfindən təsvir edilən və ya videosu çəkilən sistemli döyülmələr, qeyri-insani saxlanma şəraiti, tibbi yardımdan və digər zəruri ehtiyaclardan imtina edilməsi, qəddarlıq və təhqirlər (Ermənistan qüvvələri və separatçılar tərəfindən) Cenevrə Konvensiyasının və Avropa İnsan Hüquqları Konvensiyasının pozulmasıdır.
Bundan başqa, hesabata görə, sosial şəbəkələrdə yayılmış səkkiz videoda Ermənistan qüvvələri və separatçılar tərəfindən həlak olan Azərbaycan əsgərlərinə qarşı pis rəftar və meyitlərin təhqir olunması əks olunub.
Qeyd olunub ki, bu videolar müstəqil şəkildə yoxlanılmayıb, lakin araşdırmalara ehtiyac var.
Bu videolar Ermənistan qüvvələri və separatçılar tərəfindən öldürülmüş azərbaycanlı hərbçilərin meyitlərinin alçaldılması hallarının ilkin sübutu kimi təsvir edilib.
