Boyukmillet.com Biz yanmasaq vətən yanar
Yol polisi avtomobilinin 2 şagirdi öldürməsindən sonra İmişlidə başlayan etirazlar ətrafında qeyri-müəyyənliklər davam edir. Nəticədə polis də daxil olmaqla 3 nəfərin yaralandığı deyilir. Hadisədən qəzəblənən İmişli sakinləri qəzanı törədən yol polisi avtomobilini aşırdıb, polis idarəsi qarşısına yürüş ediblər. Yol boyu “istefa” şüarları səsləndirilib. DİN etirazçıları xuliqanlıqda ittiham etdiyi açıqlamasında saxlananların olduğunu bildirdi.
Hadisə ilə bağlı DİN-in yaydığı videogörüntü də suallar yaradıb. Videoda digər avtomobilin polis maşınının önünə çıxdığı görünür, amma görüntü dəfələrlə yavaşıdıldığı üçün polis avtomobilinin hansı sürətlə hərəkət etdiyi qaranlıq qalır, ictimaiyyət də bunu sorğulayır.
Hökumət mediası isə etirazları işıqlandırmayıb, sadəcə rəsmi məlumatları yaymaqla kifayətlənib. Müstəqil media mənsubları hazırda həbsdə olduğu üçün hadisənin təfərrüatlarını araşdırmaq, görüntüləri dəqiqləşdirmək mümkün görünmür. Hadisədən sonra internetin də bir müddət kəsildiyi bildirilir.
Baş Prokurorluğun Mətbuat xidmətindən bildirilib ki, faktla bağlı İmişli rayon prokurorluğunda Cinayət Məcəlləsinin 263.3-cü – yol hərəkəti və nəqliyyat vasitələrinin istismarı qaydalarını pozma ehtiyatsızlıqdan iki şəxsin ölümünə səbəb olduqda maddəsilə cinayət işi başlanaraq, ibtidai istintaq aparılır.
