Boyukmillet.com Biz yanmasaq vətən yanar
İtaliyanın müdafiə naziri Quido Krosetto İranla bağlı artan gərginliyin qlobal təhlükəsizlik üçün ciddi risklər yaratdığını bildirib.
Boyukmillet.com xəbər verir ki, nazir Reuters-ə açıqlamasında nüvə eskalasiyası ehtimalını “dəlilik” kimi qiymətləndirərək, vəziyyətin nəzarətdən çıxa biləcəyini vurğulayıb.
Onun sözlərinə görə, hazırkı qarşıdurma elə mərhələyə çatıb ki, atılan hər addım daha sərt cavabla nəticələnir və bu, münaqişəni daha təhlükəli istiqamətə sürükləyir. Krosetto, həmçinin ABŞ-nin İkinci Dünya müharibəsi zamanı Xirosima və Naqasakiyə atom bombası atmasını xatırladaraq, bu cür qərarların “qəbul edilən vasitə” kimi təqdim olunmasının son dərəcə riskli düşüncə olduğunu qeyd edib.
İtaliyalı nazir əlavə edib ki, ABŞ prezidenti Donald Trampın ətrafında ona etiraz etməyə cəsarət edən daha müstəqil müşavirlərin çatışmazlığı da vəziyyəti mürəkkəbləşdirir. Onun fikrincə, “heç kimin bossa qarşı çıxmağa cəsarət etməməsi” qərarların balanslı verilməsinə mane olur.
Krosetto sonda xəbərdarlıq edib ki, mövcud qarşıdurma davam edərsə, bu, yalnız region üçün deyil, bütün dünya üçün daha genişmiqyaslı və təhlükəli nəticələr doğura bilər.
