Boyukmillet.com Biz yanmasaq vətən yanar
Azərbaycan tərəfi Rusiyanın Baş Prokurorluğundan onun ekstradisiyası üçün rəsmi təsdiq istəyib
Keçmiş Rusiya hakimi Yelena Xaxalevanın Azərbaycan hüquq mühafizə orqanları tərəfindən Heydər Əliyev Beynəlxalq Hava Limanında saxlanıldığı bildirilir.
Rusiya mətbuatı yazır ki, Azərbaycan hakimiyyəti Yelena Xaxalevanın saxlanılması barədə Baş Prokurorluğa və Rusiya Daxili İşlər Nazirliyinə məlumat verib.
Məlumatın Rusiyanın hüquq-mühafizə orqanlarındakı mənbələr tərəfindən təsdiqləndiyi deyilir.
Krasnodarın keçmiş hakimi olan Xaxaleva Rusiya hakimiyyəti tərəfindən beynəlxalq axtarışa verilib. “Kommersant”ın məlumatına görə, Azərbaycan tərəfi Rusiyanın Baş Prokurorluğundan onun ekstradisiyası üçün rəsmi təsdiq istəyib.
Keçmiş hakim Rusiyaya könüllü şəkildə qayıtmaqdan imtina edərək, təqibin siyasi motivli olduğunu iddia edir. Nəşrin yazdığına görə, Xaxaleva ciddi tibbi müalicə aldığını və əvvəlcə Gürcüstanda, daha sonra Azərbaycanda olduğunu bildirib. O, Dubaya yola düşməyi planlaşdırsa da, pasport nəzarətindən keçərkən beynəlxalq axtarışda olduğu üzə çıxıb.
Yelena Xaxaleva 2017-ci ildə qızının dəbdəbəli toyundan sonra məşhurlaşıb.
Həmin toyda Nikolay Baskov və Valeri Meladze kimi məşhurlar çıxış etmişdi. Xaxaleva iddia edirdi ki, toyu keçmiş həyat yoldaşı, iş adamı Robert Xaxalev maliyyələşdirib. Krasnodar Regional Hakimlər Şurasının qiymətləndirməsinə görə, toyun dəyəri 4,5 milyon rubl olub.
2020-ci ilin iyulunda Xaxaleva vaxtından əvvəl məhkəmə səlahiyyətlərindən məhrum edilib.
O, 2016-2019-cu illər arasında ümumilikdə 128 gün işdən kənarda qaldığı üçün intizam tənbehinə məruz qalıb.
Bundan sonra Xaxaleva işdə olmadığı günlər üçün qanunsuz əmək haqqı aldığına görə dələduzluqda və vəzifə saxtakarlığında (Cinayət Məcəlləsinin 159 və 292-ci maddələri) ittiham olunub.
“Kommersant” yazır ki, büdcəyə dəyən ziyan 1,2 milyon rubl olub.
2021-ci ilin dekabrında Xaxaleva Rusiyanı tərk edib və beynəlxalq axtarışa verilib. 2022-ci ildə məhkəmə onu qiyabi həbs edib.
