Cümə , 29 Mart 2024
Drone Cameras

Mədət Quliyev: “Ulu Öndər mənə dedi ki, insanda ən vacib keyfiyyət sədaqətdir”

“Ulu Öndər mənə dedi ki, insanda ən vacib keyfiyyət sədaqətdir”.

Boyukmillet.com xəbər verir ki, bunu müdafiə sənayesi naziri Mədət Quliyev Azərbaycan Dövlət Bədən Tərbiyəsi və İdman Akademiyasında təşkil olunmuş “Tarixin dərsləri” adlı görüşdə Ümummilli Lider Heydər Əliyevlə bağlı xatirələrini danışarkən deyib.

O, Heydər Əliyevlə ilk görüşünü xatırlayıb: “İlk dəfə Ulu Öndərlə görüşəndə mənə baxaraq dedi ki, Mədət sənsən? Dedi mən elə bilirdim ki, sənin boyun 2 metrdir. Bildirdim ki, 1,67 metr boyum bu dünyadadır, 2 metr də yerin altındadır. Məndən soruşdu ki, insanda hansı keyfiyyətlərə qiymət verirsən? Bildirdim ki, gücə, ağıla, savada, qətiyyətə və s. Gənc yaşlarda idim. İllər keçdikdə gördüm ki, həqiqətən də, insan üçün ən vacib keyfiyyət sədaqətdir. İlk dəfə Ulu Öndər Heydər Əliyevlə telefonla danışanda ağır yaralı idim. Xəstəxanada müalicə olunurdum, telefon vasitəsilə əlaqə yaradıldı və dahi şəxsiyyətin səsini eşitdim. İkinci dəfə dekabrın 26-da onunla görüşmüşəm. Mənə dedi ki, sənə Milli Qəhrəman adı verilib. Məni qucaqlayıb öpdü, çox sevinmişdim. Sonra həyatımda bir neçə dəfə Ulu Öndərlə görüşmüşəm. O, daim qəlbimizdədir”.

Mədət Quliyev bildirib ki, Heydər Əliyevin Azərbaycan üçün etdikləri tarixdir: “Yüz illərlə bu barədə danışılacaq. Hər şey yadında idi və bütün sahələri mükəmməl bilirdi”.

Nazir Ümummilli Liderin həddindən artıq səmimi, dərin və savadlı insan olduğunu vurğulayıb: “Eyni zamanda sədaqətli və qətiyyətli idi. Azərbaycan Ulu Öndərin siyasətini davam etdirdi, ordusunu gücləndirdi, iqtisadiyyatını böyütdü. Həyatımın müəyyən hissəsində fikirləşirdim ki, torpağın qayıtmasını görə biləcəyikmi? Əmin idik ki, torpaq bizimdir. Ancaq bəzi dövlətlər erməni torpağı kimi qəbul edirdi. Cənab İlham Əliyevin lazımi gündə Ordusuna “İrəli!” komandası verərək, torpaqları 44 gün ərzində azad etdi. 27 sentyabr həm də mənim doğum günümdür. Ad günündə yuxudan durursan, komanda verilir ki, İrəli! Bundan böyük hədiyyə ola bilməz”.

M. Quliyev 1988-1993-cü illəri də xatırlayıb: “O dövrdə Azərbaycan Heydər Əliyevsiz qalmışdı, özbaşınalıq yaranmışdı. İnsanlar küçəyə çıxa bilmirdilər. Kreml tərəfindən Ulu Öndərin vəzifədən azad edilməsinin məqsədi var idi. Çünki bundan dərhal sonra Qarabağ müharibəsi başladı. Moskvada oturanlar yaxşı başa düşürdülər ki, Heydər Əliyev nə qədər ki, vəzifədədir, Azərbaycanın parçalanmasına imkan verməz. Həmin vəziyyətdən ölkəni yalnız Ümummilli Lider çıxara bilərdi. İnsanlar meydana çıxaraq Heydər Əliyevin vəzifəyə qayıtmasını tələb edirdilər. Belə vəziyyətdə gəlib Azərbaycana rəhbərlik etmək həm özünün, həm də ailənin həyatını riskə atmaq idi. Ancaq Heydər Əliyev qayıtdıqdan qısa zaman sonra dövlətçiliyin prioritetini, istiqamətləri müəyyən etdi. Ulu Öndər bu vəzifəyə gələndə Azərbaycanın büdcəsi cəmi 10 000 dollar idi. Həmin dövrlərdə işıqlar yanmırdı, insanlar çörək növbəsinə dururdular. Həddən artıq çətin illər idi. 1997-ci ilə kimi vəziyyət stabil deyildi. Ulu Öndərlə görüşdüyüm, onun əlini sıxdığım üçün xoşbəxt insanam. Onun 20-30 il əvvəl dediyi fikirlər bu gün reallığa çevrilir. Heydər Əliyevin təməlini qoyduğu siyasət Cənab Prezident İlham Əliyev tərəfindən uğurla davam etdirilir”.

Check Also

Qərbi Azərbaycan İcması Ermənistanı Fransanın oyunlarına getməməyə çağırıb

Qərbi Azərbaycan İcması Ermənistan hökumətini və ictimaiyyətini tarixdən dərs çıxararaq, Fransanın oyunlarına getməməyə çağırıb. İcmadan  …