Boyukmillet.com Biz yanmasaq vətən yanar
Qərbi Azərbaycan Xronikası layihəsi çərçivəsində növbəti veriliş efirə gedib.
Boyukmillet.com xəbər verir ki, jurnalist Rufik İsmayılovun bu dəfə müsahibi Qərbi Azərbaycan İcması İdarə Heyətinin üzvü, Milli Qeyri-Hökumət Təşkilatları Forumunun (MQF) prezidenti Rauf Zeyni olub.
R.Zeyni vaxtilə valideynlərinin didərgin düşdüyü Qərbi Azərbaycanın Qarakilsə rayonunun Vağudi kəndinin tarixindən, təbiətindən, maddi-mədəni irs nümunələrindən danışıb. O, uşaqlığının keçdiyi kənddə yaşadıqlarını dilə gətirib, xatirələrini bölüşüb. MQF prezidenti sadəcə Vağudinin deyil, ümumən Qərbi Azərbaycanın onun üçün müqəddəs məkan, yurd həsrəti, doğma vətən olduğunu vurğulayıb. Bildirib ki, Qərbi azərbaycanlılar 35 ildir bu həsrətlə yaşayır, xəyallarında o torpaqlara qayıdırlar. İndi yeni reallıq yaranıb və tarixi torpaqlarımıza qayıtmaq xəyalları gerçəkliyə çevrilmə ərəfəsindədir.
Qərbi Azərbaycanda soydaşlarımıza qarşı ayrı-seçkilikdən söhbət açan R.Zeyni bildirib ki, ermənilər ali təhsil alıb kəndə qayıdan azərbaycanlı kadrları işlə təmin etmir, bununla onların ölkəni tərk etməsinə şərait yaradırdılar. “Gen yaddaşımız bizə deyir ki, qarı düşmən dost olmaz”, – söyləyən MQF prezidenti ötən əsrin əvvəlində Qarakilsə rayonunda, o cümlədən Ağudidə törədilən erməni vəhşiliklərindən də danışıb. Bildirib ki, daşnaklar Ağudidə məscidə sığınan 400 azərbaycanlını amansızlıqla qətlə yetirib, ibadət evi ilə birlikdə yandırıblar.
Qərbi Azərbaycan həqiqətlərinin dünyaya çatdırılması istiqamətində görülən işlərdən danışan natiq vurğulayıb ki, soydaşlarımızın əsas tələbi beynəlxalq ictimaiyyətin səsimizə səs verməsi, nəticə etibarilə tarixi ədalətin tezliklə bərpa olunmasıdır. Onun sözlərinə görə, hazırda milyonlarla Qərbi azərbaycanlının əsas niyyəti dinc yolla, ləyaqətli şəkildə vətənə qayıtmaqdır.
Xatırladaq ki, Qərbi Azərbaycan Xronikası layihəsinin məqsədi tarixi torpaqlarımızın adının yaşadılması, tanıdılması, həmçinin azərbaycanlıların ermənilər tərəfindən deportasiyaya məruz qoyulmasından, həmin ərazilərdə mövcud olmuş, lakin adı silinən toponimlərin, saysız-hesabsız yeraltı və yerüstü maddi mədəniyyət nümunələri – qədim yaşayış məskənləri, nekropollar, kurqanlar, qala, saray və istehkam qalıqları, karvansaralar, körpülər, qəbirüstü sənduqələr, xaçdaşlar, at-qoç heykəlləri, məbəd, kilsə, məscid, pir və ocaqların üzə çıxarılması, həmin ərazinin təmiz oğuz-türk məskənləri olduğunu təsdiq edən faktların dünya ictimaiyyətinə çatdırılmasıdır.
Həmçinin Prezident İlham Əliyevin Qərbi Azərbaycanla bağlı dediyi “XX əsrin əvvəllərinə təsadüf edən xəritə bir daha onu göstərir ki, Qərbi Azərbaycan tarixi Azərbaycan diyarıdır, şəhərlərin, kəndlərin adları Azərbaycan mənşəlidir və biz yaxşı bilirik ki, indiki Ermənistan ərazisində tarix boyu Azərbaycan xalqı yaşayıb. İndi əsas vəzifə ondan ibarətdir ki, dünya ictimaiyyəti də bunu bilsin”, – fikrini əsas tutaraq, Qərbi Azərbaycan İcmasının hazırladığı Qayıdış Konsepsiyasından irəli gələn vəzifələrin təbliğidir.
Bundan əlavə, Qərbi Azərbaycanla bağlı tarixçilərin, araşdırmaçıların düşüncələrini, deportasiyaya məruz qalmış şəxslərin həyat hekayəsini işıqlandırmaqdır.
Veriliş saat 19:30-da “Baku TV-nin efirində və yutub kanalında yayımlanıb.
