Boyukmillet.com Biz yanmasaq vətən yanar
Çin Amerika F-35 gizli qırıcı təyyarəsi üçün vacib hissələri ələ keçirib.
Boyukmillet.com Bloomverg-ə istinadən xəbər verir ki, bu hissələr Avstraliyadan ABŞ-a tranzit zamanı izaholunmaz şəkildə Honkonqa yönləndirilib.
Agentliyin mənbələrinə görə, UPS şirkəti yoxlama və mümkün təmir və ya utilizasiya üçün ABŞ-a göndərilən Kral Avstraliya Hərbi Hava Qüvvələrinin F-35 qırıcı təyyarəsinin örtüyünü və silah bölməsinin qapısını daşıyırmış.
İki mənbə aydınlaşdırıb ki, Lockheed Martin Corp. tərəfindən istehsal olunan hər iki hissə təyyarənin gizliliyini artırmaq üçün radar udma materialı ilə örtülüb.
Mənbələrdən biri hissələri daşıyan nəqliyyat təyyarəsinin ABŞ-a gedərkən Cənubi Koreyada dayandığını və oradan yükün Honkonqa yönləndirildiyini bildirib. O əlavə edib ki, təyyarənin Cənubi Koreyada niyə dayandığı, yükün niyə Honkonqa göndərildiyi və ya istiqamət dəyişikliyinin qəsdən və ya təsadüfən baş verdiyi hələ də məlum deyil.
İki mənbə bildirib ki, Çin hakimiyyəti sonradan hissələri müsadirə edib, lakin onlardan xəbər yoxdur.
Agentliyin qeyd etdiyi kimi, bu hadisə ilə bağlı məlumat hər iki ölkə üçün siyasi cəhətdən həssas bir vaxtda ortaya çıxıb. Çərşənbə axşamı Çin rəhbəri Si Cinpin prezident Donald Trampın dəvəti ilə ABŞ-a dövlət səfərinə başlayıb. Eyni zamanda ABŞ Konqresinin ən azı iki komitəsi – Xarici İşlər Komitəsi və Silahlı Qüvvələr Komitəsi – qırıcı təyyarə hissələrinin Çin əlinə keçməsi hallarını araşdırır.
Hissələrin Çinə çatması, Cənubi Koreyada dayanması və ya onların daşınması üçün UPS-dən istifadə edilməsi barədə əvvəllər heç bir məlumat verilməmişdi. Politico yalnız yükün gözlənilmədən Honkonqa yönləndirildiyinə dair məlumat yaymışdı.
Pentaqon təyyarə hissələrinin qaytarılması üzərində işlədiyini bildirib: “Rəsmilər nasaz F-35 komponentlərinin daşınması zamanı yaranan problemdən xəbərdardırlar. Biz bu komponentləri geri almaq, hadisəni araşdırmaq və gələcəkdə oxşar hadisələrin qarşısını almaq üçün tədbirlər görmək üçün ABŞ hakimiyyəti və sənaye tərəfdaşları ilə fəal əməkdaşlıq edirik”.
