Azərbaycanda ötən il vergi ödəyicilərinə 1 milyona yaxın xidmət göstərilib

Vergi ödəyicilərinə xidmət mərkəzlərində 2022-ci il ərzində ümumilikdə 481 032 şəxs qəbul edilib və onlara 910 986 sayda xidmət göstərilib.

Boyukmillet.com xəbər verir ki, göstərilən xidmətlərdən 241 mindən çoxu şifahi (vergi qanunvericiliyi və inzibatçılığı ilə əlaqədar sualların cavablandırılması), 214 mindən çoxu isə elektron xidmətlər (bəyannamələrin və hesabatların, habelə müxtəlif ərizələrin tərtibatına və elektron formada göndərilməsinə köməklik göstərilməsi) olub.

Ötən il ərzində göstərilmiş ümumi elektron xidmətlərin 86 %-ni 8 xidmət növü təşkil edib.

• Qapalı zərfdə elektron sənəd mübadiləsinin aparılması üçün istifadəçi kodu, şifrə və parolun verilməsi və yenidən verilməsi;
• Bəyannamələrin (hesabatların), habelə cari vergi ödəmələrinin hesablanması barədə arayışın vergi orqanlarına təqdim edilməsi;
• Fiziki şəxsin uçota alınması və yenidən uçota alınması;
• Sadələşdirilmiş vergi üzrə sabit məbləğin, məcburi dövlət sosial sığorta və icbari tibbi sığorta haqqının ödənilməsi haqqında qəbzin verilməsi;
• Vergi ödəyicisinin fəaliyyətinin dayandırılması;
• Asan İmza sertifikatlarının verilməsi;
• Vergi ödəyicisinə arayışların verilməsi;
• Vergi ödəyicisinin uçot məlumatlarının dəyişdirilməsi.

2022-ci il ərzində 5 035 vergi ödəyicisinin iştirakı ilə 315 görüş keçirilib, 6 819 vergi ödəyicisinə ünvanlı xidmət göstərilib. Vergi ödəyicilərindən daxil olmuş 17,1 mindən çox yazılı müraciət cavablandırılıb, 10 milyona yaxın məlumatlandırma xarakterli müxtəlif növ bildiriş (məktub), vergi ödəyicilərinin mobil nömrələrinə 776 mindən artıq SMS göndərilib.

Ötən il ümumilikdə 220 822 müraciət üzrə 342 333 “Asan İmza” sertifikatı verilib.