Ukrayna ordusuna məxsus F-16 qırıcısı ilə əlaqə kəsilib

Ukrayna Silahlı Qüvvələrinin bu gün gecə saatlarında hava hücumunun dəf edilməsində iştirak edən F-16 təyyarəsi ilə əlaqəsi kəsilib.

Boyukmillet.com xəbər verir ki, bu barədə “RBK-Ukrayna” Ukrayna Silahlı Qüvvələrinin Hava Qüvvələri Komandanlığının sosial şəbəkələrdəki məlumatına istinadən bildirib.

“Mayın 16-da saat 03:30 radələrində F-16 təyyarəsi ilə əlaqə kəsilib. Ukrayna qırıcı təyyarəsi Rusiyanın hava hücumunu dəf etmək tapşırığını yerinə yetirirdi”, – hərbçilər bildiriblər.

İlkin məlumatlara görə, üç hava hədəfini məhv edən pilot dördüncüsü üzərində işləyirdi.

“Lakin təyyarədə gözlənilməz vəziyyət yaranıb. Pilot təyyarəni yaşayış ərazisindən uzaqlaşdırıb və uğurla katapult edib”, – məlumatda qeyd olunub.

Bildirilib ki, axtarış-xilasetmə qrupunun operativ işi sayəsində pilot tez tapılaraq təxliyyə edilib, onun vəziyyəti qənaətbəxşdir.