Boyukmillet.com Biz yanmasaq vətən yanar
Monteneqro (Çernoqoriya) polisi və ABŞ-ın Federal Təhqiqat Bürosu (FBI) tərəfindən həyata keçirilən birgə uğurlu xüsusi əməliyyat nəticəsində ABŞ-ın strateji infrastrukturuna milyardlarla dollar həcmində misilsiz ziyan vurmuş təhlükəli kibercinayətkar saxlanılıb.
Boyukmillet.com xəbər verir ki, Monteneqronun kurort şəhəri olan Kotorda həm İran, həm də Türkiyə vətəndaşlığı daşıyan 39 yaşlı şəxs hüquq-mühafizə orqanları tərəfindən qəfil reydlə qandallanıb. O, ABŞ-ın təhsil və dövlət infrastrukturuna qarşı irimiqyaslı və koordinasiyalı xaker hücumları təşkil etməkdə şübhəli bilinir. Rəsmi orqanların yaydığı bəyanata əsasən, bu şəxsin kiberhücumları nəticəsində ABŞ-ın 150-dən çox nüfuzlu ali təhsil müəssisəsinə (universitetlərə) ümumilikdə 3,4 milyard dollar həcmində astronomik maddi və struktur ziyan dəyib.
İstintaq materiallarında diqqət çəkən ən sensasiyalı məqam isə oğurlanmış məlumatların taleyi ilə bağlıdır. Hüquq-mühafizə orqanları qeyd edir ki, universitetlərin verilənlər bazalarından əldə edilmiş məxfi elmi-texniki məlumatlar, habelə sındırılmış istifadəçi profillərinə giriş icazələri birbaşa İranın İslam İnqilabı Keşikçiləri Korpusunun (KSİR) və Tehranın digər xüsusi dövlət strukturlarının strateji maraqları üçün istifadə olunub. Hazırda saxlanılan şəxsin ABŞ-a ekstradisiya edilməsi prosedurları araşdırılır.
