Cümə axşamı , 28 Mart 2024
Drone Cameras

Nuru Paşanın məzarına Azərbaycan torpağı səpildi

İstanbulun Ədirnəqapı məzarlığında Nuru Paşanın (Nuri Killigil) və 27 iş yoldaşının dəfn edildiyi məzarlar xeyriyyəçi iş adamı Zəki Yılmaz tərəfindən bərpa edilib.

Publika.az xəbər verir ki, bu münasibətlə Nuru Paşanın məzarı başında geniş tədbir keçirilib.

Əvvəlcə Nuru Paşa üçün cənazə namazı qılınıb. Daha sonra Azərbaycandan və Killigil ailəsinin vətəni olan Türkiyənin Kastamonu vilayətinin Bozkurt qəsəbəsindən gətirilən torpaqlar Nuru Paşanın məzarına səpilib.

Mərasimdə çıxış edən İstanbul Metropol Bələdiyyəsi muzeylər və kitabxanalar müdiri Ramazan Mindər bildirib ki, türklük öz tarixinin önəmli günlərindən birini yaşayır:

“Qafqaz İslam Ordusunun komandanı Nuru Paşanın məzarının yenidən düzəldilməsi və keçirdiyimiz bu mərasim iki ölkə arasındakı qardaşlıq duyğularının daha da güclənməsinə xidmət edəcək. Biz müştərək keçmişimizi öyrəndikcə, orada bu günümüz üçün lap çox ortaq nöqtələr tapacaq, bir-birimizə daha çox sarılaraq gələcəyə doğru daha inamlı şəkildə irəliləyəcəyik”, – deyə vurğulayıb.

Azərbaycan Xalq Cümhuriyyətinin ilk hökumətinin baş naziri Fətəli xan Xoyskinin qardaşı, general Hüseynqulu xan Xoyskinin nəvəsi Kərim Məhmətzadə ailəsinin Nuru Paşa ilə bağlı xatirələrini səsləndirib.

“Nuru Killigil” kitabının müəllifi Atilla Oral əsərin üzərində 17 il çalışdığını, Nuru Paşanın həyatının yeni səhifələrini açdıqca onun nə qədər böyük adam olduğunu gördüyünü bildirib.

A.Oral Türkiyə ilə Azərbaycan arasındakı qardaşlığın simvollarından birinin Nuru Killigil olduğunu vurğulayıb.

Azərbaycanlıların və digər Türkdilli Xalqların Əməkdaşlıq Mərkəzinin sədri İlham İsmayılov da Nuru Paşanın tarixi rolundan danışıb, onun hər iki ölkənin tarixində önəmli yer tutduğunu vurğulayıb.

Millət vəkili Qənirə Paşayeva isə Bakıdakı Türk Şəhidliyindən danışıb. O, Azərbaycan müstəqil olandan sonra ulu öndər Heydər Əliyevin Bakıda türk əsgərlərinin xatirəsini əbədiləşdirmək üçün şəhidlik kompleksi tikdirdiyini xatırladıb:

“İstər Bakıdakı şəhidlik, istərsə də Nuru Paşanın buradakı məzarı bizim üçün çox dəyərlidir. Biz bu dəyərlərə müştərək şəkildə sahib çıxsaq, gələcəyə birgə addımlayacağıq. Birlikdə olsaq, öhdəsindən gələ bilməyəcəyimiz heç bir iş olmayacağı kimi, bizi məğlub edəcək heç bir qüvvə də olmayacaq ”, – deyə Q. Paşayeva vurğulayıb.

Nuru Paşanın qardaşı nəvəsi Arzu Ənvər Əroğan Killigil ailəsinin tarixi barədə məlumat verəndən sonra babasının və ulu əmisinin adlarını daim ən yüksəkdə tutmaqdan şərəf duyduqlarını bildirib. Arzu Ənvər Əroğan, bundan sonrakı mərhələdə babasının və ulu əmisinin Türkiyədə daha yaxşı tanıdılması üçün çalışmağa davam edəcəklərini vurğulayıb.

Tədbirə Türkiyə və Azərbaycanın ictimai xadimləri, aydınları ilə yanaşı Türk dünyasının bir çox QHT və ziyalıları da qatılıb.

Check Also

Qırmızı dənizdəki vəziyyət Avropa-Cənubi Koreya yük daşımalarının qiymətini 40 faiz bahalaşdırıb

Qırmızı dənizdəki təhlükəsizliklə bağlı yaranmış vəziyyət Cənubi Koreyadan Avropaya və əksinə istiqamətdə dəniz yolu ilə …

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir