Boyukmillet.com Biz yanmasaq vətən yanar
Davam edən dəniz blokadasının bir hissəsi olaraq, ABŞ qüvvələri İranın 25 milyard dollar dəyərində xam neft ixracının qarşısını alıb, həmçinin onun 350 milyon dollar dəyərində kriptovalyuta aktivlərinin dondurulmasını təmin edib.
Boyukmillet.com xəbər verir ki, məlumat ABŞ Mərkəzi Komandanlığının (CENTCOM) rəhbəri admiral Bred Kuperin videoaçıqlamasında yer alıb: “Biz artıq İranın ən azı 25 milyard dollar dəyərində xam neft ixracının qarşısını aldıq və ABŞ-ın təxminən 350 milyon dollar dəyərində kriptovalyuta aktivlərini dondurmaq üçün qurumlararası səylərini dəstəklədik. Bu, Tehranın silahlı qrupları maliyyələşdirmək və ABŞ hərbi kampaniyası zamanı məhv edilmiş silah ehtiyatlarını və hərbi infrastrukturu bərpa etmək imkanlarını daha da məhdudlaşdırıb”.
CENTCOM rəhbəri vurğulayıb ki, ABŞ ordusu digər dövlət qurumları ilə sıx əməkdaşlıq edərək Tehrana üç əsas sahədə: neft ixracı, rəqəmsal maliyyə əməliyyatları və təhlükəsizlik qüvvələrinə ödənişlərdə əhəmiyyətli zərbə vurub.
Admiralın sözlərinə görə, əks halda bu vəsaitlər İran tərəfindən dəstəklənən proksi qüvvələri və cinayətkar şəbəkələri maliyyələşdirmək, eləcə də Amerika qüvvələrinə və regional müttəfiqlərə qarşı hücumlar təşkil etmək üçün yönləndiriləcəkdi.
Kuper qeyd edib ki, maliyyə təzyiqi İranın SEPAH üzvləri də daxil olmaqla, öz təhlükəsizlik qüvvələrinə maaş ödəmək qabiliyyətinə getdikcə daha çox təsir göstərir. Komandanın sözlərinə görə, Tehran artıq neft və enerji sektorları, sənaye, tikinti və təhlükəsizlik də daxil olmaqla bir sıra sektorlarda maaşların, pensiyaların və müavinətlərin ödənilməsini gecikdirir.
Onun sözlərinə görə, maliyyə çətinlikləri regionun müxtəlif ölkələrindəki İranla əlaqəli silahlı qruplaşmalara da təsir edib; bəziləri hətta vəsaitləri SEPAH-a yönləndirmək üçün döyüşçülərinə ödənişləri dayandırırlar.
Kuper SEPAH-ın özünün şəxsi heyətinə maaş ödəməkdə çətinlik çəkdiyini bildirib və bunu İran təhlükəsizlik qüvvələri daxilində artan maliyyə çarəsizliyinin əlaməti adlandırıb.
Onun sözlərinə görə, ABŞ-ın İrana qarşı dəniz blokadası qüvvədə qalır: dəniz idxalı və ixracına qoyulan məhdudiyyətlərin yeganə istisnası humanitar yardımdır. “Vurğulamaq istəyirəm: icazə verdiyimiz humanitar yardım istisna olmaqla, İran ixrac və ya dəniz yolu ilə heç nə idxal etmir”.
